Deur Everson Luhanga
Nasionale polisiewoordvoerder Brigadier Athlenda Mathe het gesê die dwelms, insluitend tik, kokaïen en mandrax, is tydens polisie-operasies in die Wes- en Oos-Kaap by padblokkades en tydens opsporingsoperasies gekonfiskeer.
Sy het gesê dit is die vierde dwelmvernietigingsproses vanjaar. Voor dit was die mees onlangse sessie in Oktober 2023 in Gauteng, waar R800 miljoen se dwelms vernietig is. Net in dié boekjaar is nagenoeg ‘n miljard rand se dwelms vernietig.
“In die 2022/2023-boekjaar is ses ton dwelms ter waarde van R2 miljard vernietig,” het sy gesê.
Die dwelms wat vernietig is sluit in dié waarop beslag gelê is tydens die volgende dwelm klopjagte:
• In Vredenburg het die polisie inligting gebruik en na ‘n adres gegaan waar beslag gelê is op ‘n vragmotor gelaai met R10 miljoen se mandrax-tablette. Vier verdagtes is in hegtenis geneem en een van die verdagtes, Hosia Mbuluheni Mathono, is tot 15 jaar tronkstraf gevonnis.
• In Beaufort-Wes is beslag gelê op Mandrax ter waarde van R2.5 miljoen en die beskuldigde is skuldig bevind en tot 12 jaar gevangenisstraf gevonnis.
• Ook in Beaufort-Wes is beslag gelê op R18 miljoen se tik. Die beskuldigdes is tot 15 jaar gevangenisstraf gevonnis.
• In Swellendam is beslag gelê op R4.5 miljoen se Mandrax-tablette. Die beskuldigdes is tot vyf jaar gevangenisstraf gevonnis.
SAPD nasionale kommissaris Generaal Fannie Masemola, wat die operasie gelei het, sê die polisie behaal groot suksesse met die onderskepping van dwelms in die land.
“In die afgelope drie maande het die polisie beslag gelê op kokaïen ter waarde van R200 miljoen in verskeie dwelm-klopjagte by ons hawens,” het Generaal Masemola gesê.
“Daar is in Oktober op die eerste twee besendings kokaïen by die Durbanse hawe beslag gelê en die ander groot vonds ter waarde van R65 miljoen was in November by die Gqeberha-hawe.
“Hierdie dwelmvernietigingsessies demonstreer die meedoënlose pogings van ons mans en vroue in blou om die dwelms te verwyder wat lewens en voortbestaan vernietig.”
Op die foto hierbo: Polisie lê beslag op die dwelms.
Bron: Verskaf
