Dricus du Plessis staan op die punt om geskiedenis te maak en Sondagoggend sal sy kans wees om dit te laat gebeur. Du Plessis wil die eerste Suid-Afrikaner word om UFC-goud te verwerf.
Hy veg Sondagoggend teen Sean Strickland vir die middelgewiggordel in die Ultimate Fighting Championship.
Die 30-jarige het nog net ses keer vantevore in die UFC geveg; hy het elkeen gewen, wat die goud nou beslis binne sy bereik maak.
Du Plessis gaan egter hard moet werk want Strickland, die huidige kampioen, is nie ‘n maklike man om te verslaan nie.
Strickland lyk dalk na die beter vegter, maar soos Du Plessis so gereeld na sy oorwinnings sê: “Hulle weet nie wat ons weet nie.” Hy is weereens, soos dikwels die geval met Suid-Afrikaners, die buiteperd.
Du Plessis het ‘n werklike kans om ‘n oorwinning te behaal met ‘n stoei-aanslag wat beter lyk as dié van sy opponent.
En met die krag tot sy beskikking, is een vuishou al wat hy nodig het om ‘n middelgewigkampioen te word.
Die geveg word vanaf 5vm regstreeks op DStv-kanaal 201 uitgesaai, so stel daardie wekkers!
➤ Die Afrikabeker-toernooi (Afcon) duur voort in sy tweede naweek, met Algerië wat Saterdag om 4nm die aksie teen Burkina Faso afskop. Mauritanië pak Angola dan om 7nm voordat Tunisië om 10nm teen Mali te staan kom.
Sondag begin met Marokko teen Kongo om 4nm voordat Zambië vir Tanzanië om 7nm die stryd aansê.
Bafana Bafana het dan ‘n alles-of-niks stryd teen Namibië om 10nm. Na hul openingswedstryd-nederlaag teen Mali, moet Bafana wen as hulle enige kans wil staan om tot die Afcon-uitklopfase deur te dring.
Al die wedstryde is regstreeks op DStv-kanaal 202.
➤ Verwag ‘n wonderlike naweek van rugby vir Suid-Afrikaanse spanne.
Die wedstryd om te kyk is die Stormers in Parys teen Stade Français – in winterweer wat by vriespunt gaan draai. Die Stormers kook op die oomblik en het verlede week ‘n oortuigende oorwinning teen Sale Sharks behaal, hoewel hulle teen die einde die groepsgevoel verloor het aangesien omtrent elke speler die kollig gejaag het om hul pad na oorwinning te baan.
Hopelik sou John Dobson sy span kon oortuig om Saterdag se wedstryd ernstig op te neem. Hulle kan nie hierdie een verloor nie… of kan hulle?
Daar word van die Bulle, wat tuis speel, verwag om Bordeaux Begles te klop, maar dit gaan ‘n taai wedstryd wees. Bordeaux het hul laaste drie wedstryde met ‘n ongelooflike 100 punte gewen, maar die Bulle speel puik rugby en stuur ‘n topspan in.
Die Cheetahs sou nie vir afrigter Hawies Fourie tevrede gestel het met hul nederlaag teen Pau nie. Maar Oyonnax het nog nie vanjaar ‘n oorwinning behaal nie en die Cheetahs behoort dié naweek sake reg te stel.
Die Leeus en die Ospreys is op gelyke toernooipunte, maar die Leeus speel by die huis. Ellispark sal ongelukkig weer leeg wees, so daar is maar min tuisveldvoordeel om op te reken.
Die Sharks het uiteindelik in rat geklik – al was dit net eerste rat – en sal hopelik die Dragons kan klop. Die weer in Wallis gaan baie koud wees, en moontlik nat, met ‘n loeiende wind. Jy sal nie eers jou Siberiese husky in sulke weer uitlaat nie.
Bulls vs Bordeaux Beagles Saterdag om 3nm.
Oyonnax vs Cheetahs Saterdag om 5.15nm.
Stormers vs Stade Français Saterdag om 7.30nm.
Lions vs Ospreys Sondag om 3nm.
Dragons vs Sharks Sondag om 7.30nm.
Al die rugbywedstryde kan regstreeks op DStv-kanaal 211 gekyk word. Baie van die ander wedstryde sal ook op DStv vertoon word.
➤ Die Premierliga is terug en, soos verlede naweek, is daar net vier wedstryde.
Arsenal skop sake af met ‘n Londen-derby teen Crystal Palace om 2.30nm voordat Brentford om 7.30nm vir Nottingham Forest pak.
Op Sondag verwelkom Sheffield United vir West Ham United om 4nm voordat Liverpool om 6.30nm teen Bournemouth speel.
Al die wedstryde sal regstreeks op DStv-kanaal 203 wees.
Op die foto hierbo: Dricus du Plessis
Bron: X
