Deur Buziwe Nocuze
Die Dyantyisi-gesin het omstreeks 2vm rustig geslaap toe ‘n harde slag hulle wakker gemaak het.
Siyolise Dyantyisi, ‘n huiseienaars in Delft, Kaapstad, het gedink dit is ‘n brand.
“Die eerste ding wat in my gedagtes opgekom het, was die brand. Ek het gedink dit is ‘n elektrisiteitsboks, maar was verbaas toe daar geen rook was nie,” het Siyolise gesê.
Sy het haar na die deur gehaas om te kyk wat aangaan, maar kon dit nie oopkry nie omdat dit geblokkeer was.
Haar man het probeer uitvind wat hul deur verhinder het om oop te maak, maar al wat hy kon sien was ‘n Golden Arrow-bus.
“Die bus het ons grensmuur en die voertuig in ons motorhuis beskadig. Ons is meegedeel dat die bestuurder beheer verloor het nadat mans die bus probeer beroof het deur dit met klippe te bestook,” het sy gesê.
Hul buurman se grensmuur is ook beskadig, sowel as ‘n nabygeleë shack.
“Ons dank die Here dat ons die ongeluk oorleef het; dit kon erger gewees het. Nou moet die maatskappy die skade regmaak.
“Ons verstaan dat die bestuurder van misdadigers probeer wegkom en beheer verloor het, maar nou sit ons met die gemors,” het sy gesê.
Bronwen Dyker-Beyer, woordvoerder van die Golden Arrow-busdiens, het gesê die bus het werknemers vervoer toe hulle deur onbekende gewapende mans geteiken is.
“Dit is nie duidelik wat die motief was nie, maar ‘n skoot is afgevuur, wat veroorsaak het dat ons bestuurder vir ‘n oomblik beheer oor die bus verloor het. Ongelukkig was die gevolg dat ons bus teen die grensmure van huise gebots het.”
Sy het gesê hulle het die huiseienaars gekontak om die proses te begin om die skade te herstel, en ‘n saak is by die SAPD geopen.
Wes-Kaapse polisie-woordvoerder Kaptein FC van Wyk sê Delft SAPD is op die toneel deur ‘n 49-jarige huiseienaar in kennis gestel dat die bestuurder van ‘n busmaatskappy gesetel by die Philippi-depot deur vier onbekende mans genader is terwyl hy bestuur het en beheer verloor het oor die bus.
Op die foto hierbo: ‘n Golden Arrow-busbestuurder het beheer verloor nadat hy deur vier onbekende mans aangeval is en in drie huise vasgery het
Bron: Buziwe Nocuze
