Deur Buziwe Nocuze
Die polisie het ‘n verdagte die naweek in Hanover Park, Kaapstad, in hegtenis geneem nadat gemeenskapslede hulle aangeval en hul voertuie beskadig het.
Reagan Allen, die Wes-Kaapse LUR vir Polisietoesig en Gemeenskapsveiligheid, het Maandag die aanval op beamptes van die Gevorderde Wetstoepassingseenheid veroordeel.
“Die gemeenskapslede wat na bewering aan hierdie wettelose daad deelgeneem het, behoort te weet dat hulle hulself skuldig gemaak het aan inmenging en beamptes van die wet verhinder het om hul pligte uit te voer,” het Allen gesê.
Hy het gesê Hanover Park word geteister deur bendegeweld en die polisie is daartoe verbind om die gemeenskap te dien deur misdaad aktief te beveg.
“Dit is die rede waarom ons meer beamptes ontplooi het, en die Stad Kaapstad het ook verseker dat bykomende wetstoepassingsagentskappe in die gebied teenwoordig is,” het Allen gesê.
Kashiefa Mohammed, ‘n segspersoon vir die Gemeenskapspolisiëringsforum in Hanover Park, het gesê hulle het die afgelope twee weke nege moorde en ses pogings tot moord gehad.
“Hanover Park is ‘n slagveld, met daagliks skietvoorvalle en interne gevegte tussen bendes,” het Mohammed gesê.
Sy het gesê pensioenarisse is te bang om winkelsentrum te verlaat, want die koeëls kan hulle enige tyd tref.
Sy het gesê daar is vroue “wat veronderstel is om moeders te wees” wat vir die bendes dekking bied – totdat hul kinders dood in die strate lê nadat hulle geskiet is.
“Gemeenskapslede wat bendelede beskerm moet weet dat hulle bloed op die hande het. Hou op om julle by bendelede te skaar, want ons gemeenskap word ‘n begraafplaas. Kinders kan nie hul skoolvakansie geniet nie weens die daaglikse skietery.”
Wayne Dyason, woordvoerder van Wetstoepassing, het bevestig dat drie patrollievoertuie tydens aanvalle op beamptes in Hanover Park beskadig is.
“Ons vra mense om nie beamptes aan te val nie, maar eerder saam met hulle te werk om ’n veiliger omgewing te skep,” het Dyason gesê.
“Beamptes sal voortgaan om die gebied te patrolleer en saam met die SAPD en ander toepassingsinstansies te werk.”
Op die foto hierbo: Gemeenskapslede van Hanover Park het wetstoepassers en hul voertuie aangeval in ‘n poging om ‘n verdagte te bevry
Bron: Verskaf
