Deur Zukile Majova
Dit is ‘n geval van “jy kan kyk, maar nie vat nie” vir die paralimpiër Oscar Pistorius, wat tot 2029 nie alkohol mag drink nie.
Dit is die moeilikste deel van die paroolvoorwaardes vir Pistorius, wat op Vrydag 5 Januarie uit die tronk uit kom.
Al is hy vry, sal sy gemoed maar vrot wees!
Pistorius is bekend daarvoor dat hy drank geniet en sukkel om weg te bly van die naglewe. Hy het in die middel van sy verhoor in 2014 ‘n onderonsie met die sakeman Jared Mortimer by ‘n klub in Johannesburg se luukse Sandton-sakedistrik gehad.
Die atleet is tot 13 jaar en vyf maande tronkstraf gevonnis vir moord nadat hy sy meisie, Reeva Steenkamp, doodgeskiet het. Hy het in aanmerking gekom vir parool nadat hy die helfte van sy vonnis uitgedien het.
Hy het 10 maande tronkstraf uitgedien voordat hy met huisarres vrygelaat is, maar in Julie 2016 het die appèlhof die vroeëre aanklag van poging tot moord na moord verander.
Pistorius het toe ses jaar tronkstraf gekry wat later meer as verdubbel is tot 13 jaar.
Die departement van korrektiewe dienste het gesê sy openbare profiel as ‘n suksesvolle atleet en bekende persoonlikheid beteken nie dat hy gunste van paroolbeamptes verdien nie.
“Die verhoogde openbare profiel wat aan Pistorius gekoppel word, maak hom nie verskillend van ander gevangenes nie en regverdig ook nie onreëlmatige behandeling nie.
“Die algemene paroolvoorwaardes sal op Pistorius van toepassing wees. Daar sal byvoorbeeld van hom verwag word om op bepaalde ure van die dag tuis te wees.
“Hy mag nie alkohol en ander verbode middels inneem nie.”
Pistorius is ook verbied om enige media-onderhoude te voer tot die einde van sy vonnis in 2029.
Pictured above: Oscar Pistorius
Image source: X
