Deur Zukile Majova
Tientalle musikante, akteurs en ander kreatiewe geeste sal na verwagting Woensdag na Durban se Playhouse stroom vir die gedenkdiens van die legendariese dramaturg, teaterregisseur en musikant Mbongeni Ngema.
Sy agent Sbu Ketwa het aan die media bevestig dat die skepper van die bekende toneelstuk Sarafina! se lewe gevier sal word tydens ‘n gedenkdiens wat om 12nm sal plaasvind.
Ngema is verlede week in ‘n motorongeluk dood nadat hy ‘n begrafnis in Lusikisiki in die Oos-Kaap bygewoon het.
Besonderhede van Ngema se begrafnis is nie bekend gemaak nie, maar President Cyril Ramaphosa het ‘n spesiale provinsiale begrafnis vir die legende toegestaan.
Die amptelike begrafnis sluit elemente van polisie-seremoniële eerbewyse in en is gereserveer vir vooraanstaande persone.
Nomusa Dube-Ncube, premier van KwaZulu-Natal, het Ngema beskryf as ‘n vooraanstaande Suid-Afrikaanse legende wat kreatiewe kuns en teater gebruik het om by te dra tot die stryd om vryheid.
“Ons het ‘n versoek aan die president gerig om Dr Ngema se begrafnis as ‘n spesiale provinsiale amptelike geleentheid te verklaar, hoofsaaklik om sy bydrae tot ons lang en pynlike reis na vryheid te erken.
“Ons verwelkom die respek wat die president aan Dr Ngema betoon het. Dit is inderdaad ’n gepaste eer vir Madlokovu, wat vir baie dekades onvermoeid gewerk het om Suid-Afrika deur middel van kuns op ‘n globale verhoog te plaas.”
Ramaphosa het gesê Ngema se “meesterlik kreatiewe vertelling van ons bevrydingstryd het die menslikheid van onderdrukte Suid-Afrikaners geëer en die onmenslikheid van ‘n onderdrukkende regime aan die kaak gestel”.
“Die talle produksies wat hy geskep het of waartoe hy bygedra het, het veerkragtigheid en trots onder ons as mede-Suid-Afrikaners aangevuur, en Suid-Afrika en ons vasteland na die teaters, huise en bewussyn van miljoene mense regoor die wêreld geneem.”
Op die foto hierbo: Mbongeni Ngema
Bron: X
