Deur Buziwe Nocuze
Die mense van New Cross Roads in Kaapstad het standpunt ingeneem teen diegene wat dwelms in hul gemeenskap verkoop.
Wes-Kaapse SAPD-woordvoerder Kaptein Frederick van Wyk sê lede verbonde aan die Openbare Orde Polisie in Faure was besig met misdaadvoorkomingspolisiëring en stop-en-deursoek optredes in Gugulethu toe hulle deur ‘n inwoner voorgekeer is wat hulle ingelig het oor ‘n moontlike dwelmstoorfasiliteit by ‘n perseel in New Cross Roads.
“Hulle het dadelik die inligting gebruik en die perseel dopgehou totdat hulle gesien het hoe pakkies afgelaai word en talle mense die terrein besoek,” het Van Wyk gesê.
‘n 49-Jarige vrou is in hegtenis geneem op aanklag van dwelmhandel.
Die lede het die perseel deursoek en beslag gelê op 14,770 mandrax-tablette, drie pakkies tik, ses koevertjies tik, en ‘n klein hoeveelheid kokaïen ter waarde van altesaam R1 miljoen.
Van Wyk het gesê die verdagte sal in Athlone Landdroshof verskyn sodra hy aangekla word.
‘n Inwoner het op voorwaarde van anonimiteit gepraat en gesê daar is baie huise waar dwelms aan hul gemeenskap verkoop word.
“Om huise of mense wat dwelms in ons gemeenskappe verkoop aan te meld is nie veilig nie,” het die inwoner gesê.
“Ons vertrou nie die SAPD-lede nie, want die meeste van hulle werk met daardie einste mense wat besig is om ons gemeenskappe te vernietig.”
Sy was teleurgesteld dat ‘n vrou betrokke was by die vernietiging van jongmense se toekoms.
“Ons kinders gaan nie meer skooltoe nie. Hulle het geen respek nie en misbruik ons omdat hulle dwelms gebruik. Om te hoor dat ‘n vrou al hierdie dwelms aanhou, wys dat wie ookal probeer om dwelms te beveg, nooit sal wen nie,” het die inwoner gesê.
Dumisani Qwebe, sekretaris van Nyanga Gemeenskapspolisiëringsforum, was geskok om soveel dwelms te sien.
“Gemeenskappe moet jongmense waarsku oor die gevare wat dwelms inhou. Dwelms maak jong mense dood. Dit vernietig gesinne en baie lewens,” het Qwebe gesê.
Hy was bly dat die gemeenskap nou besef dat SAPD-lede nie alleen die stryd kan wen nie.
“Ek verkondig die belangrikheid van ‘n goeie werksverhouding tussen SAPD-lede en die gemeenskap. As ons almal ons rol speel soos wat in hierdie geval gebeur het, sal baie dwelms uit ons strate verwyder word.”
Op die foto hierbo: Beslag is gelê op 14,770 mandrax tablette, tik, en kokaïen ter waarde van R1 miljoen
Bron: Verskaf
