Deur Buziwe Nocuze
Wes-Kaapse SAPD probeer ‘n taxibestuurder opspoor as deel van ‘n ondersoek na ‘n saak van verkragting, ontvoering en poging tot moord, wat in die bestuurder se voertuig begin het.
Adjudant-offisier Joseph Swartbooi, Wes-Kaapse SAPD-woordvoerder, het gesê die Kraaifontein se eenheid vir gesinsgeweld, kinderbeskerming en seksuele misdrywe het die publiek se hulp nodig om die persoon op te spoor wat in die gesigsidentifikasie (hierbo) beskryf word.
“Voorlopige ondersoek toon dat die slagoffer Saterdag per taxi na Bloekombos gery het,” het Swartbooi gesê.
“Op pad het die bestuurder in die rigting van Bottelaryweg gery waar hy die slagoffer aangerand, verkrag, en kaal in die bosse gelos het.”
Die slagoffer het later daarin geslaag om na ‘n nabygeleë restaurant te stap waar personeel haar bygestaan het met vervoer na Kraaifontein SAPD, waar sy haar beproewing aangemeld het.
Mawethu Sila, Bloewata Taxi Association se woordvoerder, het gesê die slagoffer het by die taxihalte kom aanmeld.
“Ons het haar vir meer inligting oor die voorval gevra voordat ons die verdagte gebel het,” het Sila gesê.
“Nadat ons al die inligting gekry het, het ons die polisie gebel sodat hulle met die ondersoek kan voortgaan. Ons weet nie wat daarna gebeur het nie.”
Hy het gesê die veiligheid van passasiers hang van die bestuurders af.
“Dit is teleurstellend dat passasiers nie veilig voel nie weens die dade van sommige lede,” het hy gesê.
Sila het die passasiers versoek om altyd die laaste nommers van die registrasie op die taxi se nommerplaat te onthou.
“Dit is dan maklik vir ons om die eienaar van die taxi te identifiseer in gevalle soos hierdie, of enige ander klagtes waarby ons bestuurders of lede betrokke is,” het hy gesê.
Op die foto hierbo: Wes-Kaapse SAPD vra publiek se hulp om die verdagte wat hier uitgebeeld word, op te spoor
Bron: Verskaf
