Deur Buziwe Nocuze
Bontle Letsatsi, 25, van Khayelitsha, Kaapstad, is wreed met ‘n graaf vermoor in ‘n wraakaanval nadat sy hond na bewering ‘n ander hond doodgebyt het.
Bontle het Saterdag saam met vriende gedrink toe hy besluit het om huis toe te gaan om by sy ma in te kyk.
Die oorledene se broer, Mosa Letsatsi, sê Bontle het omstreeks 9nm by die huis aangekom voordat hy terug is na sy vriende toe.
“Hy was vir ‘n paar minute tuis voordat hy teruggegaan het en die hond het hom gevolg,” het Mosa gesê.
‘n Uur later het hulle ‘n oproep ontvang om te sê Bontle moet hospitaal toe geneem word.
“Ek was verward, so ek het my na die toneel gehaas en hom erg beseer gevind,” het Mosa gesê.
Hy is meegedeel dat die hond wat sy broer gevolg het, met die verdagte se hond baklei het.
“My broer het probeer om die honde te skei, maar hulle het hom oorrompel omdat hy dronk was. Iemand het die verdagte gaan vertel dat sy hond besig is om te vrek,” het Mosa gesê.
Toe die verdagte daar aankom het hy vir Bontle op die grond aangetref, steeds besig om die honde uitmekaar uit te probeer kry. Die verdagte se hond is in die aanval dood.
Mosa het gesê hy is deur die ander drinkers meegedeel dat “terwyl hy besig was om die honde te skei, die verdagte hom en sy hond met ‘n graaf aangeval het”.
“Ek weet nie hoekom hy hom aangeval het nie. Selfs die mense wat op die toneel was het hom probeer keer, maar hy het voortgegaan om my broer aan te val.
“Nadat ek met hom hospitaal toe gejaag het, het ek die hond dokter toe geneem. Dit leef nog en hopelik sal dit nie vrek nie.”
Bontle is later in die hospitaal dood weens sy beserings.
Mosa het gesê hulle sal sy broer se liefde en glimlag mis.
“Hy was ‘n lieflike mens wat vir almal lief was. Ons is geskok dat die verdagte besluit het om hom so dood te maak. Hy het nog nooit met iemand baklei nie, en ons het nooit klagtes oor hom ontvang nie,” het Mosa gesê.
Hulle is meegedeel dat sy broer om vergifnis gepleit het terwyl hy aangeval is.
“Hy het nie teruggeveg nie, want hy het geen probleem met die verdagte gehad nie. Honde baklei heeltyd, maar dit gee niemand ‘n rede om mekaar dood te maak nie. Ons bid dat my broer geregtigheid sal kry.”
Wes-Kaapse SAPD-woordvoerder Sersant Wesley Twigg het gesê die omstandighede rondom die dood van ‘n man wat na ‘n mediese fasiliteit in Khayelitsha gebring is, word ondersoek.
“Lingelethu-Wes polisie is na die hospitaal ontbied waar die liggaam van die slagoffer deur mediese personeel uitgewys is. Luidens berigte het die slagoffer oop wonde aan sy liggaam gehad en is deur mediese personeel dood verklaar,” het Twigg gesê.
Op die foto hierbo: Bontle Letsatsi van Khayelitsha in Kaapstad is vermoor nadat sy hond met ‘n ander hond baklei het
Bron: Verskaf
