Manchester United wil dalk wraak neem, maar dis makliker gesê as gedaan vir die klub wat pas uit die Uefa Champions League geskop is.
Erik ten Hag en sy span is waarskynlik slegter daaraan toe as die vorige keer toe hulle Liverpool teëgekom het, en dit het met ‘n 7-0 nederlaag geëindig.
Hulle het Dinsdag 1-0 teen Bayern München verloor en is nou heel onder in hul Champions League groep. Hulle het verlede naweek met 3-0 tuis teen Bournemouth in die Premierliga verloor.
En nou kom hulle Liverpool teë, wat boaan die tabel is en op hul heel beste lyk.
Manchester United aanhangers en spelers kan maar net Sondag droom en hoop op ‘n wonderwerk.
Hulle sluit die naweek af op Anfield met ‘n afskop om 6.30nm.
Voor dit sal Tottenham Hotspur die naweek se sokker Vrydagaand inlei wanneer hulle om 10nm teen Nottingham Forest te staan kom.
Chelsea speel gasheer vir Sheffield United Sondag om 5nm met Manchester City teen Crystal Palace op dieselfde tyd.
Op Sondag begin Arsenal die dag met ‘n wedstryd teen Brighton om 4nm voor die naweek se hoofwedstryd begin.
Al die Premierliga aksie sal regstreeks op DStv-kanaal 203 wees.
➤ Met Desember in volle swang, sal Wanderers Stadion waarskynlik propvol Suid-Afrikaners wees wat gereed is vir ‘n prettige dag in die son.
Die Proteas sal op volle vaart wees wanneer die eerste Eendag Internasionaal tussen Suid-Afrika en Indië Sondagoggend vanaf 10vm plaasvind.
Ná die T20-reeks sal die Proteas hoop om die oorwinning in die langer formaat van die wedstryd te verseker.
Die Proteas sal regstreeks op DStv-kanaal 201 te sien wees.
➤ Durf ons hoop op nog ‘n suksesvolle naweek vir Suid-Afrikaanse rugbyspanne?
Verlede week het net die Stormers nie daarin geslaag om met ‘n wen vorendag te kom nie, maar dit was nie omdat hulle nie probeer nie. Hulle het die Leicester Tigers groot laat skrik, maar die Tiere het ‘n drie in die laaste minuut van die wedstryd gedruk. Handré Pollard was, soos verwag, op sy beste (met ‘n drie en ses skoppe) en het ongelukkig ‘n groot bydra gelewer om ‘n bonuspunt voor die Stormers se neuse weg te raap.
Die Stormers speel vandeesweek tuis teen La Rochelle. As hulle met ‘n oorwinning wegkom – dalk selfs ‘n bonuspunt kan kry – sal dit hul kanse in die Investec-beker verbeter.
Die Leeus is ook tuis en as hulle aanhou speel soos hulle oor die afgelope weke gespeel het, kan hulle redelik selfversekerd voel teen die Newcastle Falcons.
Die Bulle kyk na harde arbeid wanneer hulle Saterdagaand teen beide gure weer en gunstelinge Lyon te staan kom. Volgens die voorspelling gaan dit koud en winderig wees, maar darem droog. Die wedders se geld is nou wel op Lyon, maar moenie die Bulle afskryf nie. Jake White se span is nooit maklik om te klop nie.
Ons hou die beste vir laaste wanneer die Cheetahs op hul tuisveld teen die Sharks te staan kom. Jy kan nie help om te dink dat die sterbelaaide Haaie, insluitend hul wonderlike voorspelers, te sterk sal wees vir die boeties van Bloemfontein nie, maar Ruan Pienaar en die Cheetahs sit nooit hul voet op ‘n rugbyveld net om te verloor nie.
Alle wedstryde sal op DStv-kanaal 211 wees:
Stormers vs La Rochelle Saterdag om 3nm
Leeus vs Falcons Saterdag om 5.05nm
Lyon vs Bulle Saterdag om 7.30nm
Cheetahs vs Sharks Sondag om 3nm
➤ In die Premier Sokkerliga het Orlando Pirates die kans om van vyfde na tweede plek te spring wanneer hulle Sondag teen Golden Arrows te staan kom.
Die Buccaneers het in hul laaste vyf ligawedstryde nooit ‘n nederlaag gely teen ‘n span wat net een keer in hul laaste vyf pogings gewen het nie.
Die wedstryd skop Sondag om 3.30nm af en is regstreeks op DStv-kanaal 202 te sien.
Op die foto hierbo: Liverpool 7-0 Manchester United
Bron: X
