Deur Lucky Vince Pienaar
Nadat hulle koning gekraai het by die Dubai-sewes was dit verstaanbaar dat ondersteuners gehoop het vir ‘n spesiale vertoning van die Blitsbokke in Kaapstad.
➤ In die groepwedstryde Saterdag het die Blitsbokke goed begin deur Brittanje opsy te vee met ‘n indrukwekkende vertoning, en drie drieë teen een aan te teken (Blitsbokke 19-5 GB).
Dit was ook ‘n belangrike wedstryd, want die Britte sal waarskynlik die belangrikste teenstanders in Monte Carlo in Junie wees, wanneer die Blitsbokke een laaste desperate poging sal aanwend om vir die Olimpiese Spele te kwalifiseer.
‘n Skrikwekkende waarskuwingslig het begin flikker vir die Suid-Afrikaners teen die Verenigde State toe hulle rustyd met 14-14 gelykop was. Maar in die tweede helfte het die Blitsbokke gekliek en twee onbeantwoorde drieë gedruk. ‘n Goeie oorwinning, maar om een of ander rede was die passie nie heeltemal daar nie (Blitsbokke 26-14 VSA).
In die derde wedstryd het die waarskuwingseine soos disko-ligte begin flikker. Die Blitsbokke het nou wel net met twee punte teen Ierland verloor, met albei spanne wat twee drieë gedruk het, maar dit was ‘n platvoetvertoning terwyl Ierland op die voorvoet was, gereed vir baklei (Blitsbokke 12-14 Ierland).
➤ In hul eerste uitspeelwedstryd Sondag was die Blitsbokke nog op soek na ‘n toernooi-oorwinning, maar hulle het gou teen Australië tou opgegooi – en daar was niks in hul vertoning op die veld om aan te dui dat hulle selfs omgegee het nie.
Die manne wat die Suid-Afrikaanse sterre was in Dubai – Selvyn Davids, Rosco Spekman en Quewin Nortje – het beswaarlik opgedaag. Selfs toe die ratse spelmaker Ronald Brown op die veld gekom het, het dit geen verskil gemaak nie. Australië het drie drieë in die eerste helfte gedruk en nog een in die tweede.
Die Blitsbokke moes tevrede wees met ‘n reuse nul, wat aanhangers laat wonder het wat de hel nou net gebeur het. Blitsbokke (0 drieë) 0-28 (4 drieë) Australië. Selfs met ses spelers op die veld ná ‘n geel kaart, het die Australiërs nooit onder druk gelyk nie. Hul drieë is gedruk deur Hayden Sargeant, Nathan Lawson (2), en Dietrich Roache.
Die uitspeel vir vyfde plek was ‘n onwaarskynlike wedstryd tussen die kampioenskap se wenspanne, Nieu-Seeland en die Blitsbokke. Dit het in die eerste minuut met ‘n drie vir die All Blacks begin – nie die einde van die wêreld nie, maar ‘n tweede drie ‘n minuut later het waarskynlik die uitslag beklink.
‘n Oomblik van individuele briljantheid het die klein blits Ronald Brown onder die pale sien druk, maar die res van die wedstryd was so donker soos ‘n All Black-trui.
Op geen stadium gedurende die toernooi was daar enige bewyse van die styl wat so kenmerkend is van die Blitsbokke se wenrugby nie. Blitsbokke (1 drieë) 7-31 (5 drieë) Samoa.
Die Blitsbokke se drie is deur Ronald Brown gedruk, en Nieu-Seeland s’n deur Ngarohi Mcgarvey-Swart, Cody Vai (2), Sione Molia, en Akuila Rokolisoa.
Op die foto hierbo: Justin Geduld
Bron: X
