Liverpool is dalk nie meer die doring in Manchester City se vlees wat hulle eens was nie, maar hulle gee Pep Guardiola steeds veel om oor te besin.
Die wedywering tussen Liverpool en City het die afgelope paar seisoene ietwat afgeneem, maar dit het niks weggevat van die kwaliteit van hul vertoning wanneer hulle teen mekaar te staan kom nie.
En hierdie naweek, Saterdag om 2.30nm, sê die twee spanne mekaar die stryd aan vir ‘n plek boaan die puntelys.
City lei tans die liga met een punt bo Liverpool, en Jurgen Klopp sal gretig wees om hierdie stand van sake te verander.
Daar is natuurlik die bykomende strata van klubs wat vandeesweek van hul internasionale pouse terugkeer, met vlugvoosheid en tamheid wat verseker ‘n rol gaan speel.
Een ding is gewaarborg wanneer hierdie twee kante ontmoet: dis altyd pure vermaak.
As dit nie genoeg aksie vir jou is nie, kyk hoe Newcastle United teen Chelsea vaar wanneer hierdie twee met mening bots in die volgende wedstryd.
Newcastle lyk beswaarlik op hul beste, terwyl Chelsea bietjie van ‘n kruin ervaar. Die twee ontmoet Saterdag om 5nm.
Brentford is gasheer vir Arsenal om Saterdag se aksie om 7.30nm af te rond.
Tottenham Hotspur pak Aston Villa Sondag om 4nm voor Manchester United die reis na Everton maak vir hul kragmeting om 6.30nm.
Al die aksie sal regstreeks op DStv-kanaal 203 te sien wees.
➤ Dis die vrieskas of die sauna vir Suid-Afrikaanse spanne in die sesde ronde van die United Rugby Championship die naweek. Maar, met ‘n bietjie geluk, mag die Suid-Afrikaners dalk net met vier oorwinnings uit vier wedstryde uit die stryd tree.
Vrydag gaan vir die Stormers ‘n moeilike dag op kantoor wees: hulle kom teen Cardiff te staan en teen die tyd dat hulle op die veld draf, het die temperatuur op Cardiff Arms Park dalk tot onder nul gedaal (dis g’n grap nie). Maar daar word steeds verwag dat die Stormers die sukkelende Walliese span sal klop.
Die ander Suid-Afrikaanse spanne is terug op eie bodem en hopelik sal hulle beter vaar in ons tipiese somerweer as wat hulle oorsee gedoen het. Met die skryf hiervan was spanne nog nie aangekondig nie en was dit onduidelik of die terugkerende Springbokke vrygestel sal word om te speel.
Zebre Parma het tot dusver die grootste verrassing van die toernooi veroorsaak toe hulle die Sharks in Italië geklop het. Maar vandeesweek speel hulle teen die Leeus op hoogliggende Ellispark in 30+ grade. Dit kan heel moontlik die wedstryd van die naweek wees. Die Johannesburgse spelers was konings van die veld en om te sien hoe Sanele Nohamba die losskakelposisie sy eie maak, is pure plesier.
Connacht kan tog nie verwag om die Bulle so hoog bo seevlak en in Pretoria se middaghitte te klop nie, of hoe? Hulle sal waarskynlik ook teen vier Springbokke te staan kom wat terug is by hul tuisspan. Interessant genoeg sal dit die Bulle wees wat aan vlugvoosheid ly, aangesien hulle verlede week oorsee was en Connacht al ‘n week lank in SA is.
Selfs die Sharks kan verwag om hul eerste oorwinning van die toernooi te behaal wanneer hulle die Dragons van Wallis pak. Maar hulle kan steeds op ‘n KwaZulu-Natalse piesangskil gly. Die Dragons is slegs drake in naam, maar hulle het die Ospreys verlede week met 15 punte geklop. Ongelukkig, wanneer die Sharks besluit om te verloor, kan niemand hulle keer nie.
Vir die ware liefhebber van die spel wat altyd meer wil hê, kan die top-van-die-tafel-wedstryd tussen Glasgow en Ulster ‘n interessante skouspel opdis Saterdag om 9.35nm.
Alle wedstryde sal op DStv-kanaal 211 wees:
Stormers vs Cardiff Vrydag om 9.35nm
Leeus vs Zebre Parma Saterdag om 2.55nm
Bulls vs Connacht Saterdag om 5nm
Sharks vs Dragons Saterdag om 7.05nm.
➤ Dit is die laaste kragmeting vir MotoGP, aangesien die wedloop vir die kampioenskap by Valencia in Italië beslis gaan word. Dit lyk of Pecco Bagnaia die titel in sy sak het met ‘n voorsprong van 21 punte, maar Jorge Martin het nog ‘n kans, aangesien daar nog 37 punte beskikbaar is.
Brad Binder het ‘n week gelede ‘n frustrerende naweek in Katar gehad, maar het steeds sy pad oopgeveg na ‘n vyfde. Die kronkelende, smal baan kan net die KTM bevoordeel en moenie verbaas wees as Brad met albei elmboë uitstaan en die partytjie bederf vir die kampioenskap-aanspraakmakers nie.
Albei wedrenne sal op DStv-kanaal 210 wees:
Tissot Sprint Saterdag om 4nm
MotoGP Sondag om 4nm.
Op die foto hierbo: Liverpool en Manchester City se mooistebestes
Bron: Premierliga
