Deur Zukile Majova – Politieke redakteur
Die wêreld het met weersin toegekyk hoe die ANC, die party van Nelson Mandela, die terreurgroep Hamas ondersteun, wat meer as 1,800 mense in Israel aangeval en vermoor het.
Veral ontstellend was hoe vinnig die ANC verskuif het van die waardes wat voorgestaan is deur Madiba – die wêreldbekende globale toonbeeld vir mense en die mensdom – na ‘n party wat hande vat met Hamas.
Besef hulle hoe hulle sodoende waardevolle internasionale kapitaal wegsmyt?
Dis verregaande dat die ANC maak asof hy nie in staat is om tussen Hamas en die mense van Palestina te onderskei nie.
Die party se haat vir nie net die regering van Israel nie, maar ook vir Israeli’s as mense, het hom heeltemal verblind.
Hamas is nie ‘n organisasie van vryheidsvegters wat vir ‘n edele saak veg nie. Dit is ‘n terreurorganisasie wat onskuldige Palestyne as menslike skilde gebruik.
Die dood van meer as 4,000 Palestyne die afgelope week weens Israel se vergelding is ‘n direkte gevolg van die feit dat Hamas tussen onskuldige burgerlikes weggruip.
Die ANC moet dit veroordeel en hom by die wêreld skaar om terrorisme in die Gazastrook te beveg en uit te roei.
Maar dit gaan nie gebeur nie. In plaas daarvan, kies die ANC om homself as kranksinnig voor te doen.
Minister van Internasionale Betrekkinge, Naledi Pandor, is uitgevang dat sy ‘n direkte telefoonlyn na die leier van Hamas het.
So hoekom vertoon die ANC homself as ‘n organisasie wat van lotjie getik is?
Met verkiesings om die draai, bevind ons ons kniediep in die seisoen van politieke kaskenades.
Die ANC is onder druk om aan ongeduldige jongmense te bewys dat dit ‘n radikale organisasie kan wees.
Die party is inderdaad in die moeilikheid; hy het meer as 20% van sy steunbasis afgestaan aan linkse radikale organisasies wat die afgelope 20 jaar aan sy basis wegkalwe.
Die party loop die risiko om beheer oor Gauteng en KwaZulu-Natal te verloor, met baie peilings wat ‘n verdere vermindering van die party se steun regoor die land voorspel.
Veral die EFF praat dieselfde taal as die helfte van die ANC se lede, en sy alliansievennote Cosatu en die SAKP.
Om sy sterk standpunt oor Israel te demonstreer, het die EFF planne aangekondig om te betoog buite die Israeliese ambassade in Pretoria. En die ANC het ‘n soortgelyke plan aangekondig.
Die EFF het sedertdien sy betoging gekanselleer.
Meer as twee miljoen ANC-kiesers ondersteun nou die EFF, wat praat van die nasionalisering van myne en banke, en die onwettige oorname van kommersiële plase.
Derduisende jong swart mense in universiteite en kolleges steun die EFF.
Die EFF Studentekommando het SR-verkiesings gewen by Fort Hare Universiteit, die Universiteit van die Vrystaat, Unisa, die Universiteit van die Wes-Kaap, die Universiteit van Limpopo, Noordwes Universiteit, Tshwane Universiteit van Tegnologie, die Universiteit van Pretoria, Durban Universiteit van Tegnologie, Wits Universiteit, die Universiteite van Kaapstad, Venda en Johannesburg, en ‘n ellelange lys van TVET-kolleges.
Met die verkiesing net agt maande weg, pleit die ANC kranksinnigheid in ‘n desperate poging om te oorleef.
Op die foto hierbo: Die ANC sê hy staan saam met Palestina, terwyl hy in werklikheid vir Hamas ondersteun
