Deur Anita Dangazele
Twee Oos-Kaapse verpleegsters is in die moeilikheid nadat hulle ‘n plan beraam het om die Suid-Afrikaanse Agentskap vir Maatskaplike Sekerheid (Sassa) te bedrieg. Hulle het gemaak of daar ‘n tweeling gebore is sodat ‘n familielid die kinderonderhoudstoelae in die sak kon steek.
Nwabisa Godlwana, ‘n pediatriese verpleegster by die Bambisana-hospitaal in Lusikisiki, het na bewering haar kollega Gladys Ntlawuzana-Komboyi, wat in die kraamsaal werk, gewerf om haar te help om die geboorte van ’n tweeling op 18 November 2022 valslik te registreer.
Godlwana het Woensdag saam met haar ma, Mantshangase Godlwana, haar jonger suster, Gcobisa Godlwana, en Ntlawuzana-Komboyi in die Mthatha gespesialiseerde handelsmisdaadhof verskyn.
Volgens die Valke se segspersoon, adjudant-offisier Ndiphiwe Mhlakuvana, het Gcobisa na bewering op 29 November 2022 om geboortesertifikate by die Flagstaff Departement van Binnelandse Sake aansoek gedoen onder die voorwendsel dat sy die tweeling se ma is.
Mantshangase het namens haar aansoek gedoen vir ‘n kinderonderhoudstoelae by die Sassa-tak in Bizana.
“Die aantygings het gevolg nadat die ander verdagte na Bizana Binnelandse Sake gegaan het om ‘n vals geboortesertifikaat van ‘n nie-bestaande kind te registreer, en die departement teenstrydighede oor hierdie aangeleentheid met die Godlwana-familie opgetel het,” het Mhlakuvana gesê.
‘n Ondersoek deur die Valke het aan die lig gebring dat R4,892 se onderhoudstoelaes aan Mantshangase betaal is.
“Die ondersoek het gewys dat daardie tweeling wat valslik by Binnelandse Sake geregistreer is en ‘n toelae ontvang het, glad nie bestaan nie,” het Mhlakuvana gesê.
Die vier is Maandag deur die Bizana-tak van die Valke se ernstige korrupsie-ondersoekspan in hegtenis geneem.
Hulle is op borgtog van R3,000 elk vrygelaat en die saak is tot 9 Oktober uitgestel.
Op die beeld hierbo ter illustrasie
Bron: SAPD
