Deur Buziwe Nocuze
Ashua Mwangi se besigheid was jare lank die gewildste plek in Nyanga vir telefoonherstelwerk. ‘n Kraak in die skerm? Jy’t jou foon in die reën gelos? Mwangi kon vertrou word om jou selfoon weer so goed soos nuut te maak.
Toe die Santaco-taxistaking egter uitbreek, het plunderaars op sy winkel toegeslaan en dit tot op die grond toe afgebrand. Mwangi was nie in staat om diegene te vergoed wat hul fone verloor het nie, en het nie net sy besigheid verloor nie, maar ook sy onberispelike reputasie.
Nou probeer die plaaslike herstelwinkeleienaar aan sy kliënte verduidelik dat hy nie hul verlore selfone kan vervang nie.
“Toe die Santaco-taxistaking begin het, het ek my nie kon indink dat ek so geraak sou word nie. Ek het die winkel so vroeg moontlik gesluit op die dag wat die staking aangekondig is,” het Mwangi gesê.
Mwangi het die Vrydagoggend ‘n oproep ontvang wat hom ingelig het van ‘n brand wat sy herstelwinkel by Nyanga Terminus bereik het.
“Ons kon nie naby kom nie, want dit was te gevaarlik,” het Mwangi gesê.
“Daar is later vir my gesê my houer het heeltemal afgebrand.”
Toe die staking beëindig is, het Mwangi die moed bymekaargeskraap om sy winkel se verkoolde oorblyfsels te besoek.
“Ek het meer as 100 fone in die winkel gehad, maar hulle het almal vergaan toe die houer aan die brand gesteek is. Ek kan nie uitwerk of die skuldiges voor die brand begin fone steel het nie, maar van baie fone het net as oorgebly,” het hy gesê.
Verskeie selfone was reeds herstel en gereed vir hul eienaars om op te tel.
“Die waarheid is ek sal hulle nie kan vergoed nie. Sommige het deposito’s betaal, maar die harde werklikheid is dat ek nie die fondse het om hul geld terug te betaal of nuwe fone te koop nie. Ons is almal slagoffers van hierdie tragedie,” het hy gesê.
“Ek besef sommige mense verwag dat ek hulle moet vergoed, maar dis onmoontlik want my inkomste kom uitsluitlik uit die herstel van fone.”
Die pad vorentoe is onseker vir Mwangi wat nou die uitdagende in die gesig staar om sy besigheid te herbou.
Inwoner Luxolo Mapiti het gesê hy verstaan Mwangi se situasie.
“Dis sal selfsugtig wees om hul fone terug te eis. Mwangi kan nie hul fone terugtoor nie. Kom ons onthou dat hy ook ‘n slagoffer is. Hy moet sy besigheid uit die as laat herrys,” het Mapiti gesê.
Op die foto hierbo: ‘n Eens florerende herstelwerkwinkel by Nyanga Terminus, Kaapstad, is in puin gelê deur die onlangse taxi-staking wat Donderdag ten einde geloop het
Beeldbron: Buziwe Nocuze
