Deur Buziwe Nocuze
Ná ’n week van geweld en ontwrigting is die Wes-Kaapse Santaco-taxistaking opgeskort, wat die stad se township-gemeenskappe ‘n kollektiewe sug van verligting laat slaak het.
Die staking, wat uitgebreek het weens toenemende spanning tussen die taxibedryf en die Stad Kaapstad, het duisende mense se daaglikse lewens hewig ontwrig.
Santaco het verlede Donderdag begin met ‘n staking, met verwysing na ‘n reeks griewe, insluitend wat hulle beskou het as die onbillike skut van hul taxi’s deur die metropolisie.
Die staking is gekenmerk deur geweld, met vyf mense dood, voertuie en busse wat aan die brand gesteek is, en regeringsinstellings wat gevandaliseer is, insluitend polisiestasies in Khayelitsha en Kayamandi, Stellenbosch.
Die donker wolk het egter laat Donderdag gelig toe Santaco se voorsitter, Mandla Hermanus, gesê het die staking is amptelik afgelas.
Hermanus het in ‘n verklaring wat Donderdagaand uitgereik is, sy medelye uitgespreek met die verlies van lewens tydens die staking.
Hermanus het voorts sy spyt uitgespreek dat die besluit so lank geneem het om te bereik.
“Die welstand van ons gemeenskap en die publiek in die algemeen was nog altyd ons prioriteit, en dit maak seer om die onnodige pyn en lyding te aanskou wat plaasgevind het.”
Die ooreenkoms wat uiteindelik die staking beëindig het, sluit ‘n tydraam van 14 dae in om voertuie wat verkeerdelik geskut is vry te stel, en ‘n verbintenis van beide die taxibedryf en die regering om die kwessies wat die staking aangevuur het, reg te stel.
Inwoners ervaar ‘n mengsel van verligting en versigtige optimisme.
Zikhona Manana, 40, wat nog nie by die werk was sedert die staking begin het nie, het gesê sy is bly dis verby.
“Ek kon nie my lewe waag nie, want dit was regtig gevaarlik,” het sy gesê
Die taxibestuurder Theo Mali het die gevoel gedeel van baie bestuurders wat finansieel deur die staking geraak is. “Die meeste van ons het Stokvel. Om vir ’n week weg van die werk af te wees, het ‘n daadwerklike uitwerking op ons daaglikse lewe gehad.”
