Deur Zukile Majova
Die dae van kêrels en gades wat vrygelaat word ure nadat hulle in hegtenis geneem is vir mishandeling, is verby.
President Cyril Ramaphosa het vandeesmaand ‘n opdrag uitgereik dat geen polisieborgtog vir sake van gesinsgeweld toegestaan moet word nie.
“Ons het gereageer op die oproep vir strenger borgtogvoorwaardes vir oortreders. Trouens, ons wil nou beweeg na ‘n stadium waar, wanneer jy aan ‘n vrou raak en jy word gearresteer, daar geen borgtog vir jou is nie.
“En wanneer jy ‘n vrou doodmaak, kry jy lewenslange tronkstraf.
“Want daar is geen regverdige rede vir ons as mans om te glo dat vroue aan ons behoort nie,” het Ramaphosa gesê.
Die president het tydens die Vrouedagviering by die Uniegebou in Tshwane gesê die hof moet beskermingsbevele uitreik voordat die beweerde misbruiker vrygelaat word.
“Dit is vandeesmaand in werking en geen polisieborg mag toegestaan word aan persone wat van verkragting aangekla word nie.
“Selfs al was dit in ‘n huishoudelike verhouding, moet sulke borgtogaansoeke formeel by die hof aangevra word.
“As die beskuldigde in ‘n huishoudelike verhouding met die beweerde slagoffer was, moet die hof ‘n beskermingsbevel teen hulle uitreik voordat hulle op borgtog vrygelaat word.”
Mense wat betrokke is by groepverkragtings of reeksverkragters sal lewenslange tronkstraf opgelê word, saam met diegene skuldig van afspraakverkragting, huweliksverkragting, kinderverkragting en bloedskande.
Ramaphosa het ook ‘n proses aangekondig waar slagoffers van mishandeling aanlyn vir beskermingsbevele kan aansoek doen.
“Die geweld wat mans teen vroue en meisies pleeg is ‘n aanslag op ons gemeenskaplike menswees. Vroue voel nie veilig in hul huise, op straat, by die werk, of waar hulle studeer en aanbid nie,” het Ramaphosa Woensdag gesê.
Bheki Cele, minister van polisie, het gesê 10,512 mense het tussen Januarie en Maart 2023 verkragtingsake by Suid-Afrikaanse polisiestasies geopen.
Minstens 4,768 van die voorvalle het by die huise van die slagoffers of die huise van die oortreders plaasgevind.
Op die foto hierbo: President Cyril Ramaphosa
