Deur Buziwe Nocuze
Geweld en plundering het Maandag in verskeie winkelsentrums regoor Kaapstad uitgebreek in die nasleep van die voortgaande taxi-staking, wat baie buurte van die stad in chaos gedompel het.
Die staking het ontelbare huishoudings gestrand gelaat sonder toegang tot openbare vervoer. Duisende is nie in staat om werk of skool toe te pendel nie, wat frustrasies vererger en sommige gemeenskappe tot plundering dwing.
Skokkende video’s is op sosiale media versprei, wat roekelose mense wys terwyl hulle wegstap met gesteelde items soos TV’s, yskaste en meer.
Die SAPD het vinnig gereageer op voorvalle by winkelsentrums in Gugulethu, Mfuleni, Nyanga, Khayelitsha en Kraaifontein.
In Gugulethu het owerhede verdagtes in hegtenis geneem vir die besit van eiendom wat vermoedelik gesteel is.
Wes-Kaapse SAPD-woordvoerder Kolonel Andre Traut het berig dat betogers winkels bestorm het, en weggehardloop het met huishoudelike toestelle, klere en alkohol.
“Vyf verdagtes is in Gugulethu gearresteer vir die besit van vermoedelik gesteelde goedere. Sake van openbare geweld word ondersoek, en meer arrestasies sal waarskynlik plaasvind namate die polisie met hul ondersoek voortgaan,” het Traut gesê.
Die polisie ondersoek aktief sake van openbare geweld.
Om personeel te beskerm en verdere vandalisme te voorkom, het die Stad geriewe in risiko-gebiede vir eers gesluit.
Rob Quintas, die Stad se burgemeesterskomiteelid vir Stedelike Mobiliteit, het diepe kommer uitgespreek oor die impak van die taxistaking op inwoners se bestaan, en beklemtoon dat samesprekings of onderhandelinge nie kan plaasvind terwyl geweld en intimidasie voortduur nie.
“Dit is absoluut tragies dat duisende huishoudings nie ‘n bestaan kan maak of na die werk of skool kan pendel nie weens die volgehoue aanval op openbare vervoerdienste regoor die stad,” het hy gesê.
Inwoners het hul teleurstelling en vrees uitgespreek oor die gevolge van die plundering. Een anonieme inwoner het gekla: “Ek het geweet dat so iets sou gebeur as die staking voortduur.
“Ek verstaan nie hoekom normale mense sulke goed doen nie.”
Ander was bekommerd oor werkverliese en die uitwerking op die gemeenskap, en vra vir die onmiddellike opskorting van Santaco se taxi-staking.
Spanning het laas Donderdag ‘n breekpunt bereik toe verskeie taxi’s deur wetstoepassers geskut is, wat tot gewelddadige botsings met bestuurders gelei het.
Sedertdien is busse, vragmotors en private motors deur oproeriges regoor die stad met klippe bestook en afgebrand, en minstens drie mense is dood.
Op die foto hierbo: Inwoners wat ‘n TV en yskas weggedra het, het dit net daar laat val en laat spaander toe hulle die polisie sien aankom
Bron: Verskaf
