Deur Rzaeen Gutta
Suid-Afrika bied sy eerste Netbalwêreldbeker aan, maar dit verloop nie noodwendig seepglad nie. Duur kaartjies en diversiteitsdebatte in die hof het nou die kollig gesteel.
Die Spar Proteas se samestelling het gelei tot besprekings oor rasverteenwoordiging. Belangrike spelers soos Bongiwe Msomi en Khanyisa Chawane is daar, maar die adjunkminister van sport, Nocawe Mafu, is bekommerd oor gelyke tyd op die baan.
“Ek verstaan wat Suid-Afrikaners sê en as jy kyk na die totale aantal spelers in die span, is ek gelukkig. Maar as jy na syfers op ‘n spesifieke tyd op die baan kyk, kan daar ‘n mate van kommer wees,” het Mafu gesê.
“Hierdie gesprek moet landwyd aan die gang wees; dit is ‘n gesprek waaroor ons almal bekommerd moet wees. Ek sê nie jy moet nie hierdie vrae vra nie. Dit is ‘n belangrike gesprek, so ons moet nie die bal laat val oor kwessies van transformasie nie.”
Diversiteit is nie die enigste saak wat skares verhoed om die internasionale pronkstuk te geniet nie, met baie wat mor oor die prys van kaartjies. Kaartjiepryse vir die uitverkoopte eindstryd wissel tans van R500 tot R2,500.
Toernooidirekteur Priscilla Masisi het die duur kaartjies verdedig. Inkomste, sê sy, hou die spel volhoubaar. Maar Mafu voer aan hoë pryse is te wyte aan internasionale standaarde.
“Ons erken dat kaartjies duur is, maar terselfdertyd moet ons ook erken dat dit die Wêreldbeker is en die besluite oor pryse het nie net by hierdie reëlingskomitee berus nie.
“Die besluit is deur die wêreldliggaam gemaak, want dit is hoe hulle kaartjies beslis. Ek weet dat hulle probeer het om pryse te verlaag, maar dit gaan hier oor internasionale standaarde. Daar was dus min wat daaraan gedoen kon word – ek weet, want ek het dit met hulle bespreek.”
Op die foto hierbo: Owethu Ngubane
Bron: @netball_sa
