Deur Buziwe Nocuze
Chaos is ontketen in die strate van Kaapstad toe owerhede op taxi’s toegeslaan het tydens optredes in die middestad
Taxibestuurders het gevoel hulle word onredelik geteiken en uitdrukking aan hul woede gegee deur glo ‘n verkeersbeampte aan te rand.
Die situasie het vererger toe hulle die uitgangsroete van die taxihalte versper het, wat die ontplooiing van SAPD Openbare Orde Polisiëring tot gevolge gehad het.
Wat egter aansienlike aandag getrek het, is ‘n video wat op sosiale media die rondtes doen en wys hoe lede van wetstoepassing en metropolisie ‘n bestuurder aanrand en een van sy taxi se vensters breek.
‘n Taxibestuurder, wat op voorwaarde van anonimiteit gepraat het, was verlig dat die voorval op video vasgevang is.
“Ek is bly dat mense dié keer sal sien hoe hierdie wetstoepassers ons behandel. Dit het voorheen gebeur, maar daar was nooit bewyse nie.”
“Ons het die pad versper omdat hulle taxi’s geskut het vir geringe oortredings soos vermiste nommerplate, oor rooi verkeerslig ry, of oorlaai. Ons maak nie beswaar daarteen om beboet te word vir hierdie oortredings nie, maar hoekom die taxi’s skut in plaas van ‘n boete?
“Ons glo die Stad skep wetgewing om ons te misbruik,” aldus die bestuurder.
Die deurmekaarspul het ernstige gevolge gehad vir passasiers, wat vir etlike ure by die taxistaanplek gestrand was voordat diens hervat is.
‘n Besorgde passasier het opgemerk: “Ek is bekommerd dat misdadigers voordeel uit hierdie situasie sal trek. Die stadige begin van ons werkdag maak van ons sagte teikens vir rowers.”
Ander taxibestuurders het hul frustrasies so verwoord: “Ons kan nie toelaat dat ons soos diere behandel word nie. Ons werk hard vir ons gesinne en is nie misdadigers nie, maar tog word ons so behandel. Wat hoop die Stad om daardeur te bereik?”
Nandipha Qulwana, ‘n 45-jarige inwoner, het haar kommer uitgespreek dat taxibestuurders vergelding mag soek.
“Die hartseer deel van alles wat vandag gebeur het, is dat wanneer hierdie bestuurders besluit om terug te veg, dit nie net teen diegene sal wees met wie hulle probleme het nie. Almal, insluitend mense in private motors en busse, sal onveilig wees.”
JP Smith, burgemeesterskomiteelid vir Veiligheid en Sekuriteit, het gesê dat ‘n groep opportunistiese bestuurders chaos en verkeersknope veroorsaak het deur hul voertuie op die pad te los om die skare se frustrasie aan te hits.
Santaco Wes-Kaapse voorsitter Mandla Hermanus het gesê dat hulle ‘n vergadering met alle primêre verenigings vir Donderdag belê het.
“Ons sal ná daardie vergadering ‘n verklaring uitreik.”
Op die foto hierbo: Kaapse inwoners vrees dat die video van wetstoepassingsagente wat gesien word hoe hulle ‘n taxibestuurder aanrand, spanning tussen die owerhede en taxibestuurders kan vererger
Bron: Verskaf
