Deur Buziwe Nocuze
Suid-Afrikaners is tot vandag toe nog geskok oor die skrikwekkende voorval by Mdlalose Tavern in Nomzamo, Orlando-Oos, Soweto, net meer as ‘n jaar gelede, toe gewapende mans 16 onskuldige mense doodgeskiet het.
Onder die oorlewendes was Inga Mkoko, ‘n 26-jarige man van Nyanga in Kaapstad wat na Johannesburg verhuis het op soek na beter geleenthede as tuinier.
Hy is 13 keer geskiet. Albei sy bene is afgesit en hy het vier vingers aan sy linkerhand verloor, maar hy het oorleef.
“Ek onthou daardie dag asof dit gister was,” het hy gesê.
“Ek het pas teruggekom van die werk af en omdat ek geen elektrisiteit in my shack gehad het nie, het ek na die taverne gaan om my foon te laai.”
Hy het gesê hy was in die taverne toe dit geklink het of daar geweerskote naderkom.
“Voordat ek kon sin maak van wat aangaan, het die gewapende mans by die taverne ingebars en wild en wakker begin skiet,” het hy gesê.
Mkoko het verskrik tussen die tafels probeer wegkruip, maar die aanvallers het geen genade betoon nie. Hy het weke in die intensiewe sorgeenheid deurgebring.
Op ‘n vraag oor die motief vir die aanval, het Mkoko gesê dit gaan sy verstand te bowe.
“Ek kan steeds nie verstaan hoekom daardie mans besluit het om onskuldige mense dood te maak wat niks verkeerd gedoen het nie. Hulle was net daar om hulself te geniet,” het hy gesê.
Alhoewel dankbaar dat hy die nagmerrie oorleef het, is Mkoko se lewe omvergewerp. Hy gebruik ‘n rolstoel en maak staat op sy ma se ondersteuning vir daaglikse take.
Fotografie het vir hom ‘n bron van vertroosting geword, en hom ‘n doel gegee om te bereik. Hy neem foto’s by geleenthede en droom van ‘n mentor wat hom kan help om sy vaardighede te verbeter.
Hy is lief vir fotografie, maar hoop om weer sy vorige werk as straatverkoper te kan voortsit.
Sy ma, Funeka Mkoko, het gesê sy is dankbaar dat haar seun oorleef het, maar het erken dat hulle uitdagings in die gesig staar. Hulle is afhanklik van sy toelaegeld, maar dit skiet ver tekort van hul behoeftes.
“Ek het vroeër ‘n spaza-winkel bestuur, maar ek was gedwing om dit te sluit omdat ek vir my seun moes sorg,” het sy gesê.
Mkoko is moedeloos dat aanklagte teen die beskuldigdes teruggetrek is, maar hy fokus op sy herstel en maak staat op sy geloof.
Op die foto hierbo: Inga Mkoko, ‘n oorlewende van die massaskietery verlede jaar by Mdlalose-taverne
Bron: Buziwe Nocuze
