Die Suid-Afrikaanse Nasionale Ruimte-agentskap (Sansa) het gereageer op bewerings dat SA beplan om ruimtevaarders binne twee jaar na die Internasionale Ruimtestasie (IRS) te stuur.
Sansa erken sy ambisies om Suid-Afrikaanse ruimtevaarders op globale ruimteverkenningsendings te stuur.
Die verwesenliking van hierdie doelwit is egter nog “jare weg”. Maar Sansa beoog om binnekort sy ruimteverkenningsplanne saam met vennote te formaliseer.
Hierdie vooruitsigte is onthul in ‘n Telegram-boodskap wat aan die Russiese ambassade se amptelike Twitter-bladsy gekoppel is.
Die ambassade het inligting gedeel oor die bekendstelling van ‘n fasiliteit in Suid-Afrika om ruimterommel op te spoor en ‘n verklaring toegeskryf aan Sansa se uitvoerende hoof, Humbulani Mudau, wat daarop dui dat Suid-Afrika van plan is om twee vroulike ruimtevaarders binne twee jaar na die IRS te stuur.
In reaksie hierop het Sansa verduidelik dat hoewel hy Suid-Afrikaanse ruimtevaarders vir globale ruimteverkenning wil voorberei, besonderhede en tydlyne vir die stuur van ruimtevaarders na die IRS nie bevestig is nie.
Mudau het Suid-Afrika se ruimte-ambisies bespreek tydens die bekendstelling van die Russiese Optiese en Elektroniese Kompleks vir Opsporing en Meting van die Bewegingsparameters van Ruimterommel.
Sansa, wat reeds bydra tot menslike ruimtereise deur sy vennootskap met NASA, dra by tot die Amerikaanse ruimte-agentskap se Artemis-projek deur kommunikasie-infrastruktuur te bou.
Saamgestel deur personeelskrywer
Op die foto hierbo: ‘n Ruimteskip wat nie in Mzansi gebou is nie
