Deur Buziwe Nocuze
Spelers van Cape Town City FC was Woensdag die slagoffers van ‘n kaping in Nyanga.
Die spelers ly nog aan skok nadat die Avanza wat hulle vervoer het deur onbekende aanvallers geteiken is en hulle van besittings soos sokkerstewels, selfone en paspoorte beroof is.
Sekretaris van die Nyanga-gemeenskapspolisiëringsforum Dumisani Qwabe het gesê hy is kwaad oor die voorval en bekommerd dat dit ‘n negatiewe uitwerking op die gemeenskap sal hê.
“Wanneer die spelers hier is, moedig dit ons kinders aan om te fokus op dit waarvoor hulle lief is,” het hy gesê.
“Mense kom na ons buurt toe om kennis te deel en ons kinders aan te moedig. Maar as hulle gekaap en beroof word, sal hulle volgende keer weier om ons te besoek.”
Qwabe het gesê verdere skade word deur die misdadigers se optrede veroorsaak omdat onskuldige kinders wat wil leer en hul lewens deur sport probeer verbeter, negatief geraak kan word.
“Sport speel ‘n beduidende rol in die vorming van ons kinders se lewens. Dit verhoed dat hulle slegte dinge doen soos om by misdaad betrokke te raak,” het hy gesê.
“Ons sal alles in ons vermoë doen om misdaad in ons area te bekamp sodat enigiemand wat Nyanga wil besoek dit kan doen sonder om vir hul lewens te vrees.”
Die sekretaris het ook ‘n beroep op gemeenskapslede gedoen om nie kriminele aktiwiteite te ondersteun deur gesteelde goedere te koop nie.
“Ons kan nie die stryd teen misdaad wen as ons mense gesteelde goed koop nie. Almal moet hul rol speel in die bekamping van misdaad deur diegene aan te meld wat iets verkoop wat nie aan hulle behoort nie,” het hy gesê.
Grant Veitch, die hoof van sokkerontwikkeling by Cape Town City FC, wou nie kommentaar lewer nie, in ag genome die voortgesette polisie-ondersoek na die voorval.
Wes-Kaapse SAPD woordvoerder Adjudant-offisier Joseph Swartbooi het besonderhede verskaf.
“Die klaer was omstreeks 4:05nm naby die plaaslike sportveld in Emmsrylaan in Nyanga binne die voertuig met vier insittendes,” het Swartbooi gesê.
“Drie onbekende mans het op die motor afgeloop en vuurwapens op die slagoffers gerig, hulle deursoek, hul persoonlike besittings geroof en met die klaer se voertuig van die toneel af gevlug.”
Hy het gesê die voertuig is later in Philippi opgespoor.
“Nyanga-polisie doen nou ‘n ondersoek na die motorkapingsaak,” het Swartbooi gesê.
Op die foto hierbo: Nyanga SAPD ondersoek ‘n saak van motorkaping nadat Cape Town City FC-spelers helder oordag beroof is
Bron: Buziwe Nocuze
