Ontmoet vir Bharat Jain, die wêreld se rykste bedelaar. Hy het daarin geslaag om ‘n fortuin van byna $1 miljoen (R20 miljoen) bymekaar te maak deur bakhand te staan op die strate van Moembaai, Indië.
Bedel word altyd gesien as iets wat werkloses doen, of diegene wat deur diep waters gaan, maar Bharat het dit in ‘n winsgewende loopbaan verander.
Verslae dui daarop dat hy elke dag sowat 2,500 roepies (R550) insamel, wat uitwerk op ‘n maandelikse inkomste van R16,000.
Maar hier is die regte verrassing: Bharat woon nie in ‘n beskeie hut of ‘n vervalle krot nie. O nee! Sy huis is ‘n luukse tweeslaapkamerwoonstel, wat klomp mense lekker jaloers maak.
Hy besit ook twee winkels wat hy uithuur, en dit bring hom ‘n bykomende R6,500 per maand in die sak.
Ondanks sy rykdom vandag het Bharat maar armoedig grootgeword.
Hy het nou wel geen formele opleiding nie, maar hy gebruik sy inkomste om ‘n beter lewe vir sy kinders te skep deur hulle na ‘n gesogte kloosterskool te stuur.
Bharat beoefen bedel as ‘n loopbaan en spandeer 10 tot 12 uur per dag op straat naby gewilde plekke soos Chhatrapati Shivaji Terminus en die Azad Maidan-sportterrein.
Alhoewel sy gesin ‘n skryfbehoeftewinkel bestuur en hom smeek om op te hou bedel, is hy glad nie van plan om sy winsgewende “werk” prys te gee nie.
Saamgestel deur eie verslaggewer
Op die foto hierbo: Bharat Jain
