Deur Buziwe Nocuze
Die 71-jarige Bomkazi Sitela is gedwing om in haar lekkende shack te bly ondanks die feit dat daar vir haar ‘n HOP-huis aangebied is. Sy is een van Kaapstad se talle slagoffers van onwettige huisindringers.
Hierdie storie het geen gelukkige einde in sig nie: ondanks die feit dat daar jare gelede ‘n staatshuis aan haar toegeken is, bly die 71-jarige Bomkazi Sitela steeds in ‘n hut wat lek.
Haar regmatige huis, geleë in Area C van Khayelitsha-township in Kaapstad, word onwettig beset.
“Dis vreeslik om so te moet lewe, met die wete dat ek eintlik ‘n huis gekry het. Maar die huis word onwettig bewoon. Die departement moes lankal iets hieraan gedoen het,” het sy gesê.
“Nege jaar gelede het ‘n nie-winsgewende behuisingsorganisasie en gemeenskapslede belowe om vir my ‘n huis te bou, maar hulle het dit nie gedoen nie. Ek blameer die departement want nadat my huis onwettig beset is, moes hulle my in ‘n ander behuisingsprojek geplaas het.”
Op reënerige dae moet sy bakke en emmers onder die lekke in haar dak sit om die water op te vang, wat dit vir haar onmoontlik maak om te slaap. Sy spandeer haar nagte aan water opvee om haar shack te probeer droog hou. Sy word gereeld wakker om te sien hoe haar besittings deur die sypelwater beskadig is.
Wanneer die water tydens swaar reën op haar bed drup, moet Sitela in ‘n stoel slaap.
“Ek bedek my bed met plastiek om verdere skade te voorkom, maar ek kan nie daarin slaap nie,” het sy gesê. “Ek wil nie in hierdie krot sterf nie. Ek verdien meer as dit.”
En Sitela is beswaarlik die enigste een.
Munnera Allie, woordvoerder van die Wes-Kaapse Departement van Infrastruktuur, het gesê onwettige bewoners van HOP-huise word ‘n wydverspreide probleem in Kaapstad.
Sy het verduidelik dat Sitela se saak deel is van ‘n groter kwessie, waar talle huise binnegeval is. Weens die gevaarlike gebied is uitsettingsaksies egter destyds as te gevaarlik beskou.
“Die aanvanklike projek het ten doel gehad om goedgekeurde begunstigdes van Gugulethu, Area C, Khayelitsha en Mandela Park te akkommodeer. Rondom 2006 toe die eenhede gebou is, is hulle egter onwettig deur gemeenskapslede van Mandela Park binnegeval,” het Allie gesê.
“Die departement neem nou regstappe om Sitela se aanvanklike huis te deregistreer, en ondersoek aktief alternatiewe behuisingsoplossings vir haar en ander geaffekteerde begunstigdes.”
Op die foto hierbo: Ten spyte daarvan dat ‘n huis jare gelede aan haar toegeken is, moet Bomkazi Sitela steeds in hierdie lekkende krot woon
Bron: Buziwe Nocuze
