Wat veronderstel was om ‘n kinky avontuur in ‘n Duitse woud te wees, het in ‘n nagmerrie ontaard vir ‘n 51-jarige man.
Hy is gevind waar hy vasgebind was aan ‘n boom, met broekiekouse wat sy gesig bedek.
Die voorval, wat naby Bueckeburg in Nedersakse plaasgevind het, het die owerhede laat skarrel vir antwoorde.
Volgens polisieverslae het die man ‘n wilde nag gehad in die geselskap van ‘n geheimsinnige vrou wat hy aanlyn ontmoet het.
Maar hul witwarm ontmoeting sou ‘n bisarre wending neem.
Namate die aand se aktiwiteite opgewarm het, het die vrou hom mooitjies gewys wie die broek dra, en hy is by ‘n vasbind-speletjie ingesleep – wat nie noodwendig by sy planne ingesluit was nie.
Net toe dinge interessant begin raak, het die vrou onverwags ‘n telefoonoproep ontvang en haastig haar ry gekry. Die hulpelose passie-pel is soos ‘n warmpatat in die woud gelos.
Op sy eis in die verlate wildernis, het die man probeer om homself los te wikkel. Sy desperate pogings om van die toue wat hom gevange gehou het te ontsnap was onsuksesvol.
Gelukkig vir die vasgebinde ou, maak ‘n fietsryer en ‘n parate jagter toe hul verskyning.
Hierdie moedige menere het gereageer op die noodkrete wat deur die bome weergalm het en die man in sy benarde posisie teëgekom. Met vinnige vingers is hy van sy strik ontstrengel en so gered van ‘n onsekere lot.
Terwyl ondersoekbeamptes die saak probeer uitpluis, het die man met sy kant van die storie vorendag gekom.
Hy het vertel dat hy homself met ‘n nutssnyer bewapen het, net ingeval ‘n vinnige ontsnapping vereis sou word.
Maar die vrou het beskik oor ‘n vlak van knoop-kundigheid wat ver bo sy vuurmaakplek was, en dit het beteken sy noodhulpmiddel was totaal nutteloos.
Die man, gelukkig ongedeerd, het tjoepstil gebly oor sy verleidster se ware identiteit.
Nietemin is die lang arm van die gereg aan’t uitreik na haar in ‘n ondersoek wat mag lei tot ‘n aanklag van versuim om bystand te verleen, en die kommerwekkende klag van vryheidsontneming.
Saamgestel deur personeelskrywer
Op die foto hierbo: Jy wil nie vasgebind, met broekiekouse oor jou kop, in dié bos agtergelaat word nie
