Deur Dylan Bettencourt
SPORTKEUR: ‘n FA Cup-eindstryd tussen die twee Manchester-klubs kan hierdie naweek ‘n werklikheid word.
➤ Beide Manchester City en Manchester United sal oor die naweek gewikkel wees in FA Cup-uitspelers by Wembley Stadion.
Die lot van Manchester City sal eerste beslis word wanneer hulle Sheffield United Saterdagaand om 5:45nm die stryd aansê.
Manchester United sal uitvind wie hulle in die eindstryd gaan aandurf wanneer hulle Brighton & Hove Albion Sondagaand om 5:30nm aanvat.
Albei Manchester-klubs is gunstelinge om tot die eindstryd te vorder, maar Sheffield United en Brighton sal daarop uit wees om die bordjies te verhang.
Daar word gesê dat die FA Cup ‘n magiese kwaliteit het, en beide Brighton en Sheffield sal dalk ‘n bietjie toorkuns benodig om vir die finaal te kwalifiseer.
Manchester City jaag ‘n trippeldoelwit: nie net gaan hulle vir die FA Cup veg nie, maar ook vir die Premierliga en Champions League-trofeë.
Manchester United, aan die ander kant, is steeds in die Europa League en is op die drumpel daarvan om ‘n top-vier-eindpunt in die Premierliga deur te haak.
Manchester United het die trofee baie meer nodig as hul bure, maar City sal yslike genot daaruit put as hulle ‘n stokkie daarvoor kan steek.
Albei FA Cup-eindstryde sal regstreeks op DStv-kanaal 203 uitgesaai word.
➤ Selfs afrigter John Dobson se mees lojale ondersteuners sal erken dat sy Westelike Provinsie-spanne maar kleitrap die afgelope tyd. Vandag word hulle weereens getoets. Die hoogtepunt van die Curriebeker-wedstryde moet Pumas vs Westelike Provinsie in Nelspruit (Vrydag om 4:30nm) wees. Dis baie moeilik om ‘n wenner te voorspel, maar wat ons wel weet is dat dit ‘n skouspelagtige wedstryd gaan wees.
Slegs ‘n paar uur later (om 6:30nm) pak die Stormers Benetton in Kaapstad, en die tuisspan behoort maklik te wen. Maar die United Rugby Championship is vol verrassings, so enigiets is moontlik.
Hoe die Haaie teen die Cheetahs in Bloemfontein (om 2:30nm) vaar, gaan ‘n strawwe toets wees vir Neil Powell wat, soos John Dobson, allermins ‘n goeie seisoen beleef.
➤ Die Leeus speel hul URC-wedstryd Saterdag op Emirates Park (om 1m) teen Zebre Parma, wat die kompetisie se swartskape is. Dit is verbasend dat Zebre, ten spyte daarvan dat hulle nog nie ‘n enkele URC-wedstryd gewen het nie, steeds hard baklei elke keer as hulle voet op die veld sit.
Gaan die herlewing in die Bulle-kamp voortduur wanneer Jake White se span hul taaiste URC-wedstryd tot nog toe speel? Hulle pak Leinster op Loftus Versveld (om 4:05nm). Daar gaan wonde wees om te lek.
Die tweede wedstryd Saterdag op Loftus behels die Blou Bulle en die Leeus (om 6:30nm). Die Bulle is op die golf se kruin, maar soos die Leeus tans speel sal dit dwaas wees om hulle te onderskat.
Die enigste uitslag wat voorspelbaar lyk is die Griffons vs Griekwas wedstryd in Kimberley Sondag om 2nm. Met een oorwinning uit ses lyk dit of die Griffons vergeet het hoe om te wen.
Curriebeker en United Rugby Championship wedstryde sal op DStv-kanale 201 en 211 te sien wees.
➤ Aangesien Manchester City nie hierdie naweek aan die Premierliga deelneem nie, gee dit Arsenal ‘n kans om hul voorsprong boaan die tabel te versterk.
Die Gunners sal probeer om al drie punte teen Southampton op te tel Vrydagaand om 9nm, ná twee agtereenvolgende dooiepunte.
‘n Oorwinning vir Mikel Arteta en sy Arsenal-span sal hul voorsprong tot sewe punte opstoot voordat hulle volgende Woensdag vir Manchester City die stryd aansê.
‘n Korter wedstrydlys in die Premierliga bepaal dat Liverpool ook Saterdag om 4nm teen Nottingham Forest te staan kom, terwyl Newcastle United Sondag om 3nm gasheer speel vir Tottenham Hotspur.
Al die Premierliga-aksie sal regstreeks op DStv-kanaal 203 wees.
Op die foto hierbo: Die Manchester-derby
Fotobron: Twitter
