Deur Dalphine Tagwireyi
Ma’s wat lede is van die Apostoliese sekte in Zimbabwe, wat inentings en hospitaalbesoeke verbied, staan op teen kerkowerhede nadat meer as 60 kinders in 2022 aan masels dood is.
Hierdie dapper vroue het die Apostolic Women Empowerment Trust (AWET) gevorm om die haglike gesondheidsituasie in die gemeenskap aan te spreek.
Die groep fokus op vroue en kinders se gesondheid. ’n Ander krisis is bitter jong meisies wie se swangerskappe tragies eindig.
’n Lid van die kerk, Alice Mhendambuya, 29, het gesê sy moes teen kerkowerhede opstaan om haar kind se lewe te red. Sy het dit in die geheim gedoen om teenstand van haar man te omseil.
“My liefde vir my kind kom eerste,” het Mhendambuya gesê.
“Die sekte is patriargaal en vroue mag nie hulle menings teenoor mans uitspreek nie. Ons moet die kerk se reëls oortree om ons vryheid terug te wen.
“Dit is tragies dat die kerkleiers meen hulle weet hoe om siektes te behandel, maar hulle metodes werk nie altyd nie, en kindersterftes duur voort.”
’n Ander kerklid, Euritha Mazano, 39, het gesê: “Ons sien daarna uit om as vroue saam te staan en ons toegang tot mediese hulp te verseker. Die kwessie het al tot egskeidings gelei.”
Tendayi Gudo, die AWET se nasionale direkteur, het gesê die organisasie veg ook om dogtertjies te beskerm teen dwanghuwelike.
Sy het bygevoeg dat al hoe meer vroue en kinders teen siektes ingeënt word.
In die foto hierbo: Apostolie-sekte se lede by ’n kerkdiens
Fotobron: Verskaf
