Deur Buziwe Nocuze
Inwoners van Kuyasa in Khayelitsha het ‘n werknemer van die Stad Kaapstad daarvan beskuldig dat sy kontant geëis het voordat sy hul vullis wou verwyder.
Msindisi Ngcobo, 29, het aan Scrolla.Africa vertel hoe geskok hy was toe die werknemer geld van inwoners gevra het sodat sy vir haar iets kon koop om te drink.
“Ek onthou die dag nog goed – dit was bitter warm en ek het gedink dis hoekom sy vra. Maar toe het sy dit heeltyd begin doen, elke keer as hulle asblikke in ons buurte kom verwyder het,” het Ngcobo gesê.
Inwoners wat geweier het om vir haar geld te gee, moes met hul vullis opgeskeep sit.
“Almal ken haar, en sy het die rommel van diegene wat geweier het om vir haar geld te gee, net daar gelos,” het Ngcobo bygevoeg.
Nadat inwoners besef het dat sy glo elke keer vir mense geld vra, het hulle haar gekonfronteer.
“Julle vullisdromme is altyd vol. En ja, ek word betaal, maar jul rommel is nou een maal te veel en ek gaan heeltyd met rugpyn huis toe,” het die werknemer aan inwoners gesê.
Inwoners het beweer dat die werknemer R50 van hulle gevra het, en sommige sê hulle voel sy is geldgierig.
“Dit is mos nie reg nie – ons sukkel reeds met geld, en nou moet ons iemand betaal om hul werk te doen. Dit is onaanvaarbaar,” het nog ‘n inwoner bygevoeg.
Die Stad se Burgemeesterskomiteelid vir Stedelike Afvalbestuur, Grant Twigg, het gesê hul vullisverwyderingspersoneel word nie toegelaat om vir skenkings te vra vir die verwydering van rommel by residensiële huishoudings nie.
“Die koste van die verskaffing van ‘n insamelingsdiens word reeds gedek deur die Vaste Afval Verwyderingstarief op inwoners se rekeninge, en invorderingspersoneel word toepaslik vir hul dienste vergoed,” het hy gesê.
Op die foto hierbo: Khayelitsha-township in Kaapstad, waar ‘n werknemer van die Stad na bewering inwoners vra om vir haar geld te gee voordat sy hul asblikke leegmaak
Fotobron: Buziwe Nocuze
