Deur Zavela Makwabe
‘n Nuwe biblioteek in Dimbaza in die Oos-Kaap bring nuwe hoop vir lede van hierdie gemeenskap, waar misdaad en dwelmgebruik hoogty vier.
Vir diegene met siggestremdhede beteken die gebied se nuwe openbare biblioteek dat hulle nie meer lang afstande hoef te reis en geld te spandeer om toegang tot broodnodige inligting te verkry nie.
Die fasiliteit, te vinde in Dimbaza se Moses Twebe Great Hall, is die eerste biblioteek vir die gemeenskap van ongeveer 22,000 mense.
“Die fasiliteit beteken dat mense in hierdie gemeenskap, wat hoofsaaklik van maatskaplike toelaes afhanklik is, nie geld hoef te spandeer wat hulle beswaarlik kan bekostig om by Qonce uit te kom vir toegang tot boeke nie,” het Phiwe Konzaphi gesê.
Die dankbare 28-jarige gemeenskapsaktivis sê die meeste plaaslike mense van haar portier het nog nooit die binnekant van ‘n biblioteek gesien nie.
Konzapi het met Scrolla.Africa gepraat kort voordat Nonceba Kontsiwe, LUR van die Departement van Sport, Ontspanning, Kuns en Kultuur, die fasiliteit amptelik oorhandig het. Ingesluit is ‘n mini-biblioteek vir Dimbaza se blindes, danksy ‘n versoek van die Oos-Kaapse Braille en Drukinstituut.
Voorheen sou blinde mense een keer per week na Qonce vervoer word om toegang tot ‘n openbare biblioteek te verkry.
Kontsiwe het gesê die biblioteek was hoofsaaklik ‘n reaksie op ‘n pleidooi van blindes en siggestremdes in Dimbaza wat ‘n sentrum wou hê om hul verstandelike behoeftes te vervul.
Yolani Rhongwana, ‘n matriekleerder aan Richard Varha SSS, het gesê sy is dankbaar vir die nuwe biblioteek, want dit sal kinders soos sy help met navorsing vir hul huiswerk en skoolprojekte.
Die LUR het beaam dat skole in die gebied sal baatvind. Sy het ook die gemeenskap gevra om met die regering saam te werk om die biblioteek te beveilig.
“Ons is hier om kinders aan te moedig om te leer sodat ons ongeletterdheid kan uitroei,” het Kontsiwe gesê.
Die LUR het gesê sy sien uit na die doktorsgrade en professore wat nou uit hierdie gemeenskap gaan voortspruit.
Op die foto hierbo: Dimbaza Bilioteek
Fotobron: Verskaf
