Deur Khaya Ndaba
Thamsanqa Majela het skool gebank in Mamelodi en weggeglip om klas te loop in tradisionele Zuludanse.
Dit was in 2004. Snel vorentoe tot in 2023, en nou bevind Thamsanqa hom in Johannesburg se teaters met oorspronklike dansvertonings oor geestelikheid en mitologie.
Die wenner van Standard Bank se Jong Kunstenaartoekenning vir 2022/23 is ’n multi-dissiplinêre optree-kunstenaar en ’n trotse lid van die LGBTQ+ gemeenskap.
Sy komende projek, genaamd Siren, is van 2 tot 4 Maart in die Connecting Streams Theatre Festival op die planke.
Dit is ’n dansstuk wat 25 minute lank duur, en inspirasie put uit seegebonde mensagtige wesens uit die Griekse miologie, wat matrose die dood in lei met hulle sang.
Vir dié stuk werk Thamsanqa saam met Thuli Binda, ’n professionele moderne danser wat by die Siwela Sonke Dance Theatre opgelei is.
Binda sal die choreografie en storievertelling behartig. Die stuk ondersoek sosiale temas soos gender-gebasseerde geweld, die wanvoorstelling van vroulikheid, en magsdinamiek.
“Ek wil my ’n ander wêreld verbeel, en alles wat my lewe sosiaal en polities raak neem en ’n verhaal vertel van waar ons is en waarheen ons mik,” het Thamsanqa gesê.
Thamsanqa werk ook saam met ander plaaslike en internasionale queer kunstenaars, wat Keaoleboga Seodigeng, Dada Masilo en Manaho Shimokawa insluit.
Hy is ’n danser, choreograaf en dosent in bewegingstudies, en hy dien op ’n komitee van die South African Dance Alliance.
In sy grootwordjare het Majela ’n voorliefde vir dans gehad. Hy het ’n eenjaar-program by die Staatsteater bygewoon, waar hy sy tegnieke gesmee en nuwe vaardighede aangeleer het.
Hy het ’n beurs in Brussel, België losgeslaan by die Ateljee vir Navorsing en Opleiding in die Uitvoerende Kunste.
Hy is veral bekend vir produksies soos The Last Supper, SPACTRAL, en Mommy Mommy.
In die foto hierbo: Thamsanqa Majela
Fotobron: Verskaf
