Deur Buziwe Nocuze
‘n Fotograaf van die Cape Times is van sy kamera beroof nadat hy Woensdag foto’s geneem het van kinders wat teruggaan skool toe in Khayelitsha – een van die gevaarliker Kaapse buurte.
Phandulwazi Jikelo, wat al ‘n string toekennings vir sy werk ontvang het, het pas klaar gekiek aan Laerskool Chuma-leerders se terugkeer na die skoolbanke, toe hy lont ruik.
Vroeër die dag was daar ‘n betoging by die skool, so Jikelo kon nie binne die skoolterrein parkeer nie.
Aangesien ek van die omgewing afkomstig is en die meeste mense my ken, het ek nie oorweeg dat ek geteiken mag word nie, en het dus buite die skool geparkeer,” het hy aan Scrolla.Africa gesê.
Nadat hy sy werk voltooi het, het hy saam met ‘n ander joernalis na die motor teruggekeer. Toe hy die deur toemaak, het hy iemand hoor sê “gee dit vir my”. Hy het gevra “wat”, en die antwoord was “gee my die kamera”.
Jikelo het probeer domspeel en gevra na watter kamera die aanvallers verwys – totdat hulle hul vuurwapen gelaai het.
“Toe hulle die wapen oorhaal, het ek geweet hulle maak nie grappies nie. Hulle het my selfoon en my toerusting gegryp en weggehardloop,” het hy gesê.
“Ek was nie bang vir hulle nie, want selfs toe hulle vir my kamera begin vra het, het ek gevra van wie se kamera hulle praat – totdat hulle belowe het om my te skiet. Dis toe dat ek agterkom ek is besig is om beroof te word.”
Zintle Mdaka, die joernalis wat saam met Jikelo was toe die voorval plaasgevind het, het nooit gedink sy sou eendag so ‘n misdaad beleef nie.
“Om ‘n vuurwapen te sien en nie te weet of hulle gaan skiet nie, is die mees traumatiese deel.
“In die meeste gevalle het rooftogte nie ‘n goeie uitkoms nie. Ons het oor sulke stories geskryf, en sommige mense word vir hul besittings vermoor,” het sy gesê.
Op die foto hierbo: Phandulwazi Jikelo wen ‘n Vodacom-toekenning
Fotobron: IOL
