Deur Buziwe Nocuze
Ouers beskuldig Laerskool Inkanini in Khayelitsha daarvan dat hulle op R100 omkoopgeld aandring om ’n plek vir hulle kinders in die skool te verseker.
“Ek is Woensdag soontoe omdat ek gehoor het daar is nog plek,” het ’n ouer gesê wat anoniem wil bly, uit vrees dat haar dogter uitgesluit sal word. “Toe ek daar aankom, was ek verbaas toe ’n lid van die personeel vra dat ek R100 neersit om my kind te registreer.
“Ek het nie nou die geld nie. Ek moes gaan leen, want ek wou nie hê my dogter moet die hele skooljaar misloop nie. Al die ander skole is vol,” het sy aan Scrolla.Africa gesê.
Die ouer het gesê sy weet dis verkeerd, maar sy het nie ’n keuse gehad nie. Ander ouers het gesê hulle moes R150 betaal.
’n Gemeenskapleier, Zuziwe Njamela, wil hê die onderwysdepartement moet ingryp en die beweerde korrupsie stopsit.
“Die departement moet sonder waarskuwing na die skool toe kom en met ouers praat. Daar gaan baie dinge aan by die skool,” het sy gesê.
Njamela sê sy weet ouers moes van verlede jaar af omkoopgeld betaal.
“Hulle weet die ouers sal enigiets doen vir hulle kinders se toekoms, en maak misbruik daarvan.”
’n Segspersoon van die Weskaapse Departement van Onderwys, Bronagh Hammond, het gesê die departement was nie bewus van die klagtes nie, maar die kringbestuurder is in kennis gestel, en sal dit met die skool bespreek.
“Skole mag nie registrasiefooie of enige ander derglike fooie aan voornemende ouers hef nie,” het Hammond gesê.
Skoolfooie mag eers gehef word nadat ouers skriftelik in kennis gestel is dat hulle kinders by die skool ingeskryf is.
“Hulle mag vra vir ’n deposito nadat die ouers amptelik ’n plek by die skool vir hulle kinders aanvaar het. Hierdie betaling mag egter nie as voorwaarde vir die kind se aanvaarding gestel word nie, en dit moet as deel van die skoolfooie geld.”
In foto hierbo: Laerskool Inkanini in Khayelitsha, Kaapstad, word daarvan beskuldig dat hulle omkoopgeld van ouers eis om vir hulle kinders van ’n plek te verseker
Fotobron: Verskaf
