Deur Buziwe Nocuze
Langa-gemeenskapslede wil hê hul nuwe stasiebevelvoerder moet op sy “nuttelose” polisiebeamptes fokus en patrollielede met rus laat.
Tydens ‘n vergadering wat in ‘n publieke area langs Guga Sithebe gehou is, het die gemeenskap belowe om alles in hul vermoë te doen om twee lede van Langa Safety Patrol (LSP) te beskerm wat op 10 Januarie op aanklag van moord in hegtenis geneem is.
Die twee is gearresteer ná die aanranding van ‘n persoon wat later in die hospitaal dood is, volgens Wes-Kaapse polisiewoordvoerder Kaptein Frederick van Wyk.
Ter ondersteuning van die LSP sal elke persoon R100 bydra, terwyl slegs R50 van die ouer garde verwag word. Die geld gaan bydra tot die patrolleerders se prokureursfooie.
Sakelui het gereël dat ses Quantum-taxi’s inwoners hof toe sal neem wanneer die patrolleerders hul volgende verskyning.
Aktivis Apostle Zongamele Baliso sê sommige mense wil die patrollie vernietig. “Patrol is ons enigste hoop, en solank as wat ons lewe sal ons hulle ondersteun en bystaan. Hulle offer hul tyd op om die gemeenskap te beskerm – iets wat ons polisie versuim om te doen.”
LSP se volgende hofdatum is 23 Januarie. “Ons sal hulle finansieel moet ondersteun. Hulle was daar vir ons; dit is nou tyd vir ons om waardering te betoon. Patrol is die beste ding vir Langa, en ons vertrou hulle meer as wat ons polisiebeamptes vertrou.”
Die patrollie is bekend daarvoor dat hulle onwettige misdadigers vasvat en op die LSP Facebook-blad laat bieg.
Baliso is uit die veld geslaan oor die stasiebevelvoerder se versoek dat almal wat deur die patrollie aangerand is, na vore moet kom en dit aanmeld. “Daardie verklaring alleen wys dat hy nie die patrollie wil hê nie. Dit wys dat hy liewer misdadigers ondersteun as diegene wat hulle met hul werk help deur misdaad in die gemeenskap te bekamp.”
‘n Gemeenskapslid verstaan nie hoekom die patrolleerders in die eerste plek in hegtenis geneem is nie. “Ek wil nie te veel oor die moord praat nie, maar die oorledene het op een van die video’s wat op die Facebook-blad geplaas is gesê as hulle hom weer vang, moet hy doodgemaak word.
“Hy het al talle misdade gepleeg, aanhoudend. Hy het ons geterroriseer.”
Hulle glo dat iemand probeer om die patrollie te stuit. “Ons het opgehou om sake by ons SAPD aan te meld omdat dit nutteloos is. Ons gebruik hulle net wanneer ons ‘n beëdigde verklaring en stempel benodig, want dit is waarmee hulle goed is.”
Stasiebevelvoerder Kolonel Tebogo Jacobs het gesê: “Ons moet met alle strukture saamwerk vir die veiligheid van die gemeenskap, maar daar is riglyne en reëls wat al die instellings beheer en wat gerespekteer en nagekom moet word.”
Op die foto hierbo: Langa-gemeenskapslede in Kaapstad het ‘n vergadering gehou ná die arrestasie van twee patrollielede; die patrolleerders is van moord beskuldig, en die gemeenskap het belowe om hulle te ondersteun gedurende hierdie moeilike tyd
Fotokrediet: Buziwe Nocuze
