Deur Thathe Msimango
Khumbulani Nzimande, voormalige wenner van die K2-afdeling van die Dusi Kanomarathon, meen ’n swart kanovaarder kan eendag die solo-afdeling wen, maar nie sonder ’n enorme geldelike hupstoot nie.
Hy het die rasse-ongelykheid in dié sportsoort uitgelig, en vergelyk swart deelnemers sonder borge met ’n kar sonder brandstof. Tog glo hy dis nie onmoontlik nie. “Dit gaan moeilik wees, maar ek glo ’n swart kanovaarder gaan tog eendag die solo-afdeling wen.”
Die Dusi word elke jaar oor ’n tydperk van drie dae tussen Pietermaritzburg en Durban in KwaZulu-Natal beslis. Dit vind op die Msunduzi en uMgeni riviere plaas, oor ’n afstand van 120 km.
Die wedvaart bestaan uit die K1-afdeling vir alleendeelnemers en K2 vir pare. Dit vind vanjaar van 16 tot 18 Februarie plaas.
Nzimande, wat die K2-afdeling in 2020 saam met Andy Birkett gewen het, sê borgmaatskappye sal meer geld in swart kanovaarders moet belê om ’n K1-wenner moontlik te maak.
“Ons swart kanovaarders kry nie veel geldhulp nie. Daar is borge wat die gapings probeer vul, maar dis nie genoeg nie,” sê Nzimande, wat in die Vallei van Duisend Heuwels bly.
Met die marathon wat al nader kom, maak die 27-jarige ster van die MyLife-span die gedagte af dat hy die gunsteling is.
“Ek twyfel sterk of ek selfs onder die voorste tien sal eindig,” het hy aan Scrolla.Africa gesê.
“Om eerlik te wees, my fokus is op my gesin. Ek het onlangs getrou en ons het ’n nuwe baba, so dis waar ek die meeste van my tyd deurbring.
“Daar is ’n klompie sterk ouens soos Siseko Ntondini, wat ek dink ’n gevaar vir die ander inhou. Mpilo Zondi is ook op dreef. Maar die wedvaart vereis ervaring, en dit kan die bepalende faktor wees.”
Foto hierbo: Khumbulani Nzimande in ’n kano
Fotobron: verskaf
