By Doreen Mokgolo
As kind is sy vertel sy’s te lelik, te donker en te lank, maar vandag dra internasionale model en aktrise Lethabo Sarah Khunou uiteindelik haar melanien met trots.
Sy pryk nou gereeld onder die vaandel van groot internasionale handelsmerke soos Vogue en Bellagio, en het onlangs as die jong Amenza verskyn in die trefferfliek The Woman King, wat deur bekroonde Amerikaanse aktrise Viola Davis vertolk word.
Die 27-jarige van Stinkwater, Hammanskraal, is vir jare deur haar portuurgroep gespot oor haar fisiese gelaatstrekke – soveel so dat sy drie keer tydens haar laerskoolloopbaan probeer selfmoord pleeg het.
Khunou het gesê dat sy beangs was om skool toe te gaan weens die afknouery.
“Ek is vir ‘n kameelperd uitgeskel, my gelaatskleur is vergelyk met ‘n teerpad, en daar is gesê my maer lyf lyk soos die siek, ondervoede en verswakte kinders van Ethiopië, van wie foto’s in die media versprei is.
“Almal het iets oor my te sê gehad. ‘n Vriendin se ma het my eenkeer aangeraai om kookolie met lyfroom te meng vir ‘n ligter gelaatskleur en ‘n ander het vir my gesê om altyd ‘n somerhoed te dra om die son van my gesig af te keer,” het sy aan Scrolla.Africa vertel.
Khunou se groot deurbraak in die vermaaklikheidsbedryf het gekom toe sy as die 2015 Sunbabe gekroon is in ‘n modelkompetisie wat deur ‘n plaaslike dagblad aangebied is.
Sy het gesê haar reis na roem is ook belemmer deur verwerping en aanbevelings om haar gelaatstrekke te verbeter.
Tydens oudisies vir rolverdelings is daar vir haar gesê sy is te lelik, te donker of te maer, en sy is aangemoedig om na die gimnasium te gaan om spiere te bou. Sy is selfs aangesê om haar vel te bleik.
Khunou sê sy het besluit om vrede te maak met haar gelaatstrekke nadat sy besef het Afrika-modelle soos Alek Wek is trots op hul gelaatskleur.
“Ek dra nou my melanien met trots en werk om jongmense te motiveer om hulself te aanvaar en hoog te ag. Niemand het die reg om te dikteer hoe ons oor ons fisiese eienskappe moet voel nie,” het sy bygevoeg.
Foto hierbo: Lethabo Sarah Khunou
Beeldbron: Verskaf
