By Lucky Maree
“Sterk wind wat geleidelik bedaar; meestal bewolk. (70%) kans van reënbuie. Min (1%) kans van donderbuie.”
Dit is die AccuWeather-voorspelling vir Sydney, Australië vir Donderdag, en vir Vrydag is die kanse van reën selfs groter.
En in ‘n sport waar daar statistieke vir alles is, is dit die enigste syfers wat die wedstryd kan laat afwyk van nog ‘n nederlaag vir die lomp Proteas. Net die hemele kan die Proteas nou red.
As jy ‘n Aussie-ondersteuner is, sal jy bid dat die reën lank genoeg wegbly oor die volgende paar dae sodat Australië se kolwers kan voortgaan om die Suid-Afrikaanse boulaanval uitmekaar te moker. Van die eerste vyf Aussie-kolwers het net kaptein David Warner misluk en 10 lopies aangeteken. Tussen die volgende vier het hulle twee honderdtalle en twee vyftigtalle aangeteken – tot dusver.
Teen die einde van spel was Usman Khawaja net vyf lopies weg van ‘n dubbele honderdtal en niks dui daarop dat hy nie daardie lopies sal kry as hy weer gaan kolf nie. Travis Head het die ondersteuners bederf met ‘n trefhou wat hoogs-eerbaar sou vertoon in ‘n beperkte-boulbeurte wedstryd, met 70 lopies van 59 balle af.
En die Proteas? Daar word gesê dat ware geloof is om dieselfde aksie oor en oor te herhaal en te hoop op ‘n ander uitkoms. Die Proteas se vertoning blyk daardie ou gesegde te bevestig terwyl hulle die een aflewering ná die ander in die algemene rigting van die Aussie-paaltjies laat val.
Om twee dae te swoeg sonder veel beloning is moeilik vir enige sportman, maar dit is die aard van krieket; om positief te bly en die omstandighede te oorkom is wat internasionale krieketspelers veronderstel is om te doen.
Anrich Nortje was die een speler wat ‘n bietjie durf getoon het. Sy gemoed bly blink en hy verwag om ‘n paaltjie met elke bal te kry. Marco Jansen is stadig om te reageer selfs wanneer hy ‘n goeie dag beleef, en dit is moeilik om sy houding te peil.
Maar dit lyk asof die ander Suid-Afrikaners bloot hul bewegings sonder enige fut uitvoer.
Baklei om te wen is die spil waarom sport draai. Om alles te gee, selfs wanneer alles verlore is, is ‘n strawwe toets van karakter. Geen sportliefhebbers hou daarvan as hul spanne verloor nie, maar hulle haat dit as hul spanne die handdoek ingooi.
Die Proteas het reeds die reeks verloor en dis duidelik dat net die Aussies enige kans staan om die wedstryd te wen, maar daar’s meer op die spel.
Sal die Proteas in die volgende dae hul man staan en vir ons bietjie karakter wys? Suid-Afrika kyk.
Australië 475 vir 4.
Top Aussie-kolwers: Usman Khawaja 195 nie uit nie, Steven Smith 104.
SA paaltjienemers: Anrich Nortje (2), Kagiso Rabada, Keshav Maharaj.
Op die foto hierbo: ‘n Aussie-krieketaanhanger hoop op sonskyn
Beeldbron: Getty Images
