By Lungani Zungu
Die ANC is briesend nadat ‘n nuwe politieke party wat deur ‘n voormalige lid gestig is, aansoek gedoen het om sy naam – AANC – in volgende jaar se nasionale algemene verkiesing te laat registreer.
Party mense sê selfs die logo van Alex Mzwane se All African National Congress (AANC) toon skreiende ooreenkomste met dié van die ANC.
Pule Mabe, die ANC se nasionale woordvoerder, het Mzwane berispe van Bloemfontein af, waar die ANC die naweek sy 111de verjaardagvieringe aanbied.
“Dit is ‘n doelbewuste poging om ons kiesers en lede te mislei en te verwar wanneer daar volgende jaar gestem gaan word. Maar wie ook al hieragter sit, hulle sal nie slaag nie,” het hy aan Scrolla.Africa gesê.
Hy wou nie aandui of die party ‘n formele klag by die OVK gaan indien nie.
Mzwane het die bewerings verwerp en gesê: “Baie voormalige ANC-lede het hul begeerte uitgespreek om by die party aan te sluit wanneer dit volgende jaar aan die verkiesing deelneem. Niemand het die ANC se kleure gesteel nie. Hierdie kleure is gratis vir enigiemand om te gebruik.”
Die ANC is hoogs verdeeld in die Vrystaat – soos in baie ander provinsies – wat lei tot ‘n uittog van sommige leiers wat by opposisiepartye aansluit of hul eie partye stig.
Dit is nie onbevaarde waters vir die ANC nie, aangesien dit nie die eerste keer is dat die party in ‘n identiteitsoorlog met ‘n ander politieke party verstrengel is nie.
In 2005 was partylede die josie in toe die African Independent Congress (AIC) deur ‘n minder bekende figuur, voormalige ANC-lid Mandla Galo, van stapel gestuur is.
Die ANC het Galo daarvan beskuldig dat hy stemme deur misleiding gewen het en beweer dat die party kleure soortgelyk aan dié van die ANC – swart, groen en geel – in hul logo gebruik het om kiesers, veral niksvermoedendes en bejaardes, te mislei.
Die AIC behou twee setels in die Nasionale Vergadering.
Heelwat meer onlangs in 2020 is Herman Mashaba se party, ActionSA, deur ‘n ander politieke speler, Party for Action, voor die hof gedaag omdat hulle na bewering sy logo gesteel het.
Hy kon egter sy party registreer en het aan die plaaslike regeringsverkiesings van 2021 deelgeneem.
Totdat die OVK, wat betaak is om toesig te hou oor verkiesings en die registrasie van politieke partye landswyd, die AANC se registrasieproses afsluit, sal die party nie op die stembrief verskyn nie.
Sy leiers is vol vertroue dat die party met dieselfde naam en logo op die stembrief sal pryk.
OVK-woordvoerder Kate Bapela kon nie vir kommentaar bereik word nie, aangesien sy nie voor publikasie op Scrolla.Africa se boodskappe en oproepe gereageer het nie.
Op die foto hierbo: Sien jy die verskil? Die ANC se ikoniese logo langs die nuwe AANC s’n
Prentbron: verskaf
