Miljardêr Elon Musk is ‘n stoere aanhanger van Twitter-peilings (selfs wanneer bots daaraan deelneem), maar is miskien nie so trots op sy nuutste een nie.
In ‘n meningspeiling wat hy self Sondagaand geplaas het, het meer as 10 miljoen mense ten gunste daarvan gestem dat hy uittree as die baas van Twitter, ná sy rampspoedige aanvang as baas van die sosiale media-webwerf.
Toe hy die peiling plaas het Musk sy volgelinge belowe dat hy die resultate daarvan sal eerbiedig. Toe die meningspeiling Maandag gesluit het, het 57.5% gestem ten gunste van sy uittrede.
Nadat die peiling die wisselvallige entrepreneur onomwonde aangesê het om te waai, het hy daarop aangedring dat daar geen opvolger is wat gereed is om by hom oor te neem nie.
Musk het getwiet: “Niemand wat Twitter aan die gang kan hou wil hierdie werk hê nie.”
Hy het ook geantwoord op ‘n ander gebruiker wat aangevoer het hulle kan die werk baie beter doen as wat hy tot dusver kon.
Hy het teruggekap en gesê: “Jy moet baie van pyn hou. Een vangplek: jy moet jou lewenslange spaargeld in Twitter belê.”
Volgens Forbes het Musk verlede maand sy status as die wêreld se rykste persoon afgestaan aan Bernard Arnault en sy familie. Hy het aan Twitter-gebruikers gesê hy is sedert sy verkryging van die webwerf op ‘n vinnige baan na bankrotskap toe. “Wil jy steeds die werk hê?” het hy gevra.
‘n Besluit om ‘n rekening te verbied wat die ligging van sy private straler verlede week nagespoor het, is gevolg deur ‘n massaskorsing van joernaliste wat oor die verbod berig het.
Musk se mondsnoer van hierdie joernaliste is ver en wyd veroordeel.
Dis beswaarlik die eerste keer dat Musk ‘n Twitter-peiling gebruik om groot besluite te bevestig – die verkoop van ‘n tiende van sy Tesla-belange na een peiling in 2021, die herstel van Donald Trump se rekening na ‘n tweede verlede maand, en derdens die ommekeer van ‘n besluit om ‘n reeks rekeninge op te skort.
“Vox Populi, Vox Dei,” het Musk getwiet ná die Trump-peiling.
Saamgestel deur Mashudu Mabila
Op die foto hierbo: Elon Musk
Beeldbron: The Guardian
