Buziwe Nocuze
In groot stede word winkeliers en eienaars van die buiteland af dikwels mishandel, ontvoer vir ‘n losprys, of gedwing om beskermingsgelde te betaal.
Maar die lewe is veel rooskleuriger vir diegene wat werksaam is in die plattelandse dorpie Lusikisiki in die Oos-Kaap.
Hulle het ‘n goeie verhouding met die gemeenskap.
John Abebe het aan Scrolla.Africa gesê hy lees of hoor net op die nuus stories oor buitelandse winkeliers wat ontvoer en vermoor word.
“Ek wens mense in die stede kon die liefde en dankbaarheid ervaar wat ek van die dorpenaars ontvang. Ek weet ek is veilig hier, want ons almal trek voordeel uit mekaar.”
Abebe gee dorpenaars kruideniersware op krediet en hulle maak op hul beurt seker dat hulle hom betaal wanneer hul salarisse of Sassa-toelaes ontvang.
“Dis ‘n teken van ons wederkerige vertroue en respek. Ek gee vir hulle kruideniersware op krediet omdat ek hulle vertrou en hulle betaal hul skuld omdat hulle my respekteer.”
Op spesiale vakansiedae soos Kersfees gee Abebe gratis lekkers en koekies uit sy winkel aan plaaslike kinders om sodoende die ouers te bedank vir hul ondersteuning,
“Die dorpenaars het my met liefde verwelkom. Ek het nog nooit soos ‘n buitelander gevoel nie, want hulle behandel my soos een van hul eie mense. Dit moet op ander plekke ook so gebeur. In plaas daarvan om mekaar te misbruik en te haat, moet ons die liefde versprei.”
Nog ‘n buitelander wat gevra het om anoniem te bly is al agt jaar lank in die dorp.
“My broers wat in Kaapstad bly wil na die dorpies toe trek, want dis niks lekker nie en hulle weet hul kan enige oomblik vermoor word.”
“Ek is lief vir die dorpsmense omdat hulle eerlik is en ons wil hê hulle moet weet ons waardeer die liefde en respek wat hulle aan ons betoon. Om in ‘n vreemde land te wees is moeilik, maar nie vir ons nie. Ons geniet onsself hier.”
Dorpsbewoner Zilungile Ngxakana, 62, het aan Scrolla.Africa gesê dis te danke aan die buitelandse winkeliers dat hulle nooit op’n leë maag gaan slaap selfs al het hulle nie geld het nie.
“Niemand sal ‘n hand teen hulle lig in ons dorpie nie. Hulle is mense wat groener weivelde hier kom soek het. Hulle het hul land vir ‘n rede verlaat en ons het nie nodig om hulle sleg te behandel nie,” het hy gesê.
Op die foto hierbo: ‘n Buitelandse winkelier in Lusikisiki
Beeldbron: Buziwe Nocuze
