Buziwe Nocuze
‘n R1,000 losprys is geëis van die familie van ‘n 14-jarige tiener wat vermis word.
Maar die vermeende ontvoerders het geen verdere kontak met die vermiste Alulutho Pupu se familie gemaak sedert hulle Sondag die geld geëis het nie.
Die tiener van die dorpie Zinqolweni in Lady Frere, Oos-Kaap, het Saterdag 10 Desember na ‘n salon gegaan om haar hare te doen en is ná 5nm daar weg, maar sy het dit nooit huis toe gemaak nie.
Haar familie het bekommerd geraak toe hulle sien dit word laat en sy is nog nie tuis nie.
Haar suster, Luhlenathi Pupu, sê sy het haar suster gebel en haar foon het direk na stempos toe gegaan.
“Ek het die salon gebel en hulle het bevestig sy het omstreeks 5nm vertrek het om na die taxi-staanplek toe te gaan,” het sy gesê.
Dit blyk dat sy nie daar uitgekom het nie, want die mense van haar dorpie het haar nie by die taxi-staanplek raakgesien nie.
“Ons het nie daardie nag geslaap nie in die hoop dat sy aan die deur sou klop, maar ons het tot die oggend gewag en sy het nie huis toe gekom nie.”
Sondagoggend het hulle haar weer probeer kontak. Hulle was opgewonde toe haar foon lui, maar die foon is beantwoord deur ‘n man wat geëis het dat hulle R1,000 betaal vir Alulutho se veilige terugkeer.
“Ons sou die geld probeer kry om my suster te red, maar die man het die foon neergesit voordat ons vir besonderhede kon vra. Dit is skrikwekkend. Mense wat vermis word, word dikwels dood gevind. Ons hoop hierdie keer sal die storie ‘n gelukkige einde hê.”
Oos-Kaapse polisiewoordvoerder, Kaptein Siphokazi Mawisa, het gesê ‘n saak van ontvoering is vir ondersoek geopen nadat ‘n 14-jarige meisie Saterdag vermis geraak het terwyl sy na die salon in die dorp gegaan het.
“Daar word beweer dat haar ouma haar selfoon gebel het, wat beantwoord is deur ‘n man wat geld geëis het, en die man het die volgende dag die aanvraag verhoog.”
Enigiemand wat lig kan werp op haar verdwyning of inligting het oor waar Alulutho Pupu haar bevind, kan ondersoekbeampte Sersant Ronnie Present by 073 173 7839 of Lady Frere SAPD by 074 878 0008 kontak.
Op die foto hierbo: Alulutho Pupu
Beeldbron: Verskaf
