Zukile Majova
Sommige lede van President Cyril Ramaphosa se kabinet het die bedanking op Woensdag van Andre de Ruyter, Eskom Groep se hoof uitvoerende beampte, met ope arms verwelkom.
Minister van vervoer, Fikile Mbalula, is voor in die koor van diegene wat beweer dat die regering al lankal van De Ruyter ontslae wou raak.
“Die Eskom HUB se bedanking gee ons die geleentheid om ‘n persoon te kry wat goed ingelig is oor Eskom se uitdagings,” het hy geskryf. “Inderdaad goeie nuus.”
Mbalula is onaantasbaar as sleutelbondgenoot van die president in sy poging om ‘n tweede termyn as leier van die ANC te vermag.
Nog meer so is Gwede Mantashe, minister van minerale bronne en energie, wie se aanvalle die afgelope week vir De Ruyter van sabotasie beskuldig het. Dit was eenvoudig die laaste strooi vir Eskom se uitvoerende hoof.
Ramaphosa, onder skoot vir die Phala Phala-skandaal en in die spervuur voor vandeesweek se ANC-verkiesingskonferensie, kon nie tot die redding kom van ‘n man wat hy met die hand gekeur het om die mislukte nutsdiens te laat herleef nie.
Dit was gepas dat De Ryter sy aankondiging gemaak het tydens ‘n week van Fase 4 en Fase 5 beurtkrag – so die Suid-Afrikaanse publiek gaan nie lang trane stort nie.
Maar wie sal bereid wees om iets aan te pak wat na ‘n saak van onmoontlikheid lyk?
De Ruyter, wat in 2019 aangestel is, was Eskom se 13de uitvoerende hoof sedert 2007.
Die kabinet, as hoofaandeelhouer in die kragvoorsiener, het die grootste sê in die aanstelling van ‘n nuwe HUB en dus in die toekomstige rigting van die maatskappy.
Mpho Makwana, voorsitter van die Eskom direksie, het bevestig De Ruyter sal die maatskappy eers op 31 Maart 2023 verlaat.
“De Ruyter het ingestem om vir ‘n bykomende tydperk langer as die vasgestelde 30-dae kennis aan te bly om kontinuïteit te verseker terwyl ons dringend na sy opvolger begin soek.”
Pravin Gordhan, minister van openbare ondernemings, het gesê: “Andre het ‘n enorme las namens Suid-Afrika gedra, en ek wil hom bedank vir sy opoffering en onverskrokkenheid in ‘n moeilike werk.”
De Ruyter se bedanking kom as nasleep van die bevestigde bedanking van hoofbedryfsbeampte Jan Oberholzer, wat die kragvoorsiener in April 2023 gaan verlaat.
Die bedryfskenner Dirk de Vos het aan Scrolla.Africa gesê dit gaan naas onmoontlik wees om die volgende Eskom-baas te werf.
“Dit het ‘n onmoontlike pos geword en die vereistes daarvan kan nie nagekom word nie. Die probleem is dat die staatsaandeelhouer nog nooit heeltemal verstaan het hoe Eskom werk en wat daarmee fout is nie.
“Jy het twee ministers wat in beheer is; Gwede Mantashe, minister van energie, en Pravin Gordhan van openbare ondernemings.”
Hoofuitdagings vir die nuwe HUB is om die maatskappy te red sonder dat nuwe kapitaal aan nuwe projekte bestee word.
Die ander uitdaging is om Eskom se skuld van R400 miljard terug te betaal sonder beduidende verhogings in tariewe.
En die grootste uitdaging van alles is politieke sabotasie, waardeur georganiseerde bendes toegelaat word om te plunder en roof reg onder die neus van ‘n regering wat hom beswaarlik daaraan toewy om misdadigers vas te trek.
Op die foto hierbo: Andre de Ruyter
Beeldbron: @Mzwanele
