Anita Dangazele
Brandbestryders het vir drie dae lank gestoei met veldbrande wat plantegroei regoor Nelson Mandelabaai in die Oos-Kaap verswelg het.
Die erns van die situasie is uitgelig met die aankoms uit Kaapstad van ‘n “lugtrekker” vliegtuig – wat soos ‘n gewasspuiter werk en in staat is om groot volumes water op die vlamme te stort.
Die AT-802 lugtrekker het Woensdag by twee Huey-helikopters aangesluit, wat saam met ‘n Cessna-uitkykvliegtuig die dag spandeer het om ‘n brand tussen Seaview en Beachview met water te bombardeer.
Net toe brandbestryders Donderdag dink hulle het die stryd gewen, het nog ‘n veldbrand in Fairview uitgebreek, net ‘n paar meter weg van ‘n elektriese substasie en aangrensende woongebied.
Dinsdagaand het ‘n monsterbrand langs die kus af gespoed, byna tot in die New Rest informele nedersetting in Seaview. Dit het vuur gemaak onder munisipale amptenare, wat met behulp van Gift of the Givers die buurt se bejaarde en verswakte inwoners kon ontruim.
Die inwoners, wat by Seaview-gemeenskapsaal gehuisves is, het na hul informele nedersetting teruggekeer nadat die brand daar geblus is.
Mzwabantu Mabhele, 33, het agtergebly terwyl hy gewag het vir ‘n ambulans om sy rolstoelgebonde ma op te laai, wat erge pyn verduur het omdat sy op die saal se koue vloer moes slaap.
Hy het gesê: “Gelukkig is die brand geblus voordat dit naby ons huise kon kom.”
Nelson Mandelabaai Munisipaliteit (NMBM) se uitvoerende burgemeester, Retief Odendaal, het gesê die Metro se brandbestryders werk 24 uur per dag saam met ander belanghebbendes om die impak in toom te hou.
“Die vlamme is tans onder beheer, maar brand steeds, en die situasie kan vinnig draai soos windtoestande verander – ons verwag sterk winde later in die dag, wat verskeie brande weer kan laat opvlam,” het hy gesê.
Die Metro het bevestig dat geen beserings op hierdie stadium aangemeld is nie. Een of twee Seaview eiendomme het egter geringe skade gely.
Odendaal het inwoners versoek om nie oop vure sonder toesig te laat nie.
“Voetgangers en motoriste moet ook nie brandende sigarette weggooi nie, aangesien dit ‘n bevestigde oorsaak van veldbrande is,” het hy bygevoeg.
Rondom 2:30nm op Donderdag het brandbestryders as voorsorgmaatreël ‘n brandlyn geskep naby eiendomme langs die Baakensvallei in die Fernglen-omgewing.
Helikopters was steeds druk besig om water te skep uit die Lafarge steengroewe in Cotswold.
Op die foto hierbo: ‘n Huey-helikopter bombardeer ‘n veldbrand naby die Fairview-substasie.
Beeldbron: Anita Dangazele
