Buziwe Nocuze
Andile Lili, ‘n lid van die Wes-Kaapse ANC-wetgewer, is in hegtenis geneem nadat hy glo ‘n skoolhoof geklap en geëis het dat sy Vrydag die skoolperseel verlaat.
Lili, wat ook die SBL-voorsitter by Inkanini Laerskool in Khayelitsha is, is in hegtenis geneem en later op waarskuwing vrygelaat.
Lili het ná sy vrylating met Scrolla.Africa gepraat en ontken dat hy die skoolhoof aangerand het. Hy het gesê al wat hy wou hê, is dat die skoolhoof die terrein moet verlaat.
“Ek het nooit ‘n vinger op haar gelê nie. Dis als leuens. Ek wil haar uit die skool uit hê omdat sy onbevoeg is en geen idee het hoe om haar te doen werk nie,” het hy gesê.
Hy het gesê sy probleem met die skoolhoof is dat sy versuim om besluite te neem wanneer sake aan haar gerapporteer word.
“Ek het ‘n onderwyser aangemeld wat ook ‘n DJ is. Bedags is hy by die skool en snags werk hy as DJ. Hy kom moeg skool toe en die kinders, my kind inkluis, druip in sy vak,” het Lili gesê.
Lili beweer die DJ-onderwyser is altyd laat vir skool aangesien hy eers in die vroeë oggendure met sy nagskof klaarmaak.
“Ons kinders se toekoms is belangrik. Ons kan nie agteroor sit terwyl hy doen net wat hy wil nie. Die skoolhoof moes al lankal met hom afgereken het, maar sy sê nie ‘n woord nie.”
‘n Ouer het gesê sy verstaan Lili se frustrasie, maar hy moet die skoolhoof toelaat om haar werk te doen.
“As hy dit nie goedkeur nie, moet hy die Onderwysdepartement nader om die probleem op te los.”
Bronagh Hammond, woordvoerder van die Wes-Kaapse Onderwysdepartement, het gesê hulle het met die SBL-voorsitter gepraat, en dat hy geen reg gehad het om die skoolhoof te verhinder om die skoolterrein te betree nie.
“Sy hantering van beweerde griewe kannie goedgepraat word nie. Daar is prosesse wat konstruktiewe betrokkenheid moontlik maak. Dit is by verskeie geleenthede aan die SBL-voorsitter gekommunikeer,” het Hammond gesê.
Adjudant-offisier Joseph Swartbooi, Wes-Kaapse SAPD-woordvoerder, sê die polisie het ‘n 47-jarige man op aanklag van aanranding in hegtenis geneem.
“Die verdagte is gewaarsku om Woensdag in die hof te verskyn en omstandighede rondom hierdie voorval word ondersoek.”
Op die foto hierbo: Laerskool Inkanini in Khayelitsha, Kaapstad.
Beeldbron: Verskaf
