By Doreen Mokgolo
Enkele dae voordat sy moordenaar op parool uit die tronk vrygelaat gaan word, is Chris Hani se gedenkteken in Ekurhuleni erg beskadig deur hewige storms.
Saterdagmiddag het ‘n marmerblad wat aan een van die gedenkteken se vier hoë pilare vasgeheg is, op die grond neergestort en oor die anti-apartheidsheld se monument aan skerwe gespat.
‘n Veiligheidswag by die Thomas Nkobi-gedenktuin in Elspark het gesê dat hulle tydens die storm ‘n harde slag van binne die fasiliteit af gehoor het.
Toe hulle ondersoek gaan instel, het hulle gevind dat dele van die struktuur beskadig is.
Die veiligheidswag, wat gevra het om nie genoem te word nie, het gesê hy vermoed nie dat die struktuur opsetlik deur enigiemand beskadig is nie.
“Die storm was hewig; van die bome binne die fasiliteit is ook ontwortel,” het hy aan Scrolla.Africa gesê.
“Ek het selfs gevrees dat ons veiligheidskantoor, wat ‘n hut is, beskadig sou word.
“As iemand wel die struktuur gevandaliseer het, sou hulle ook Chris Hani se grafsteen –net ‘n paar meter weg van die monument af is – ontsier het, maar dis onaangeraak gelaat,” het hy gesê.
Die struktuur is in April 2015 opgerig ter nagedagtenis aan die gevalle held wat 29 jaar gelede vermoor is.
In ‘n verklaring wat deur die ANC in Gauteng vrygestel is, het die sekretaris Thembinkosi “TK” Nciza gesê die ontheiliging van die monument is “verpletterend” aangesien dit plaasvind “op ‘n moeilike oomblik in ons geskiedenis”. Hani se sluipmoordenaar, Janusz Walus, sal in die komende dae uit die tronk vrygelaat word nadat hy verlede week parool toegestaan is deur die Konstitusionele Hof in ‘n presedentskeppende uitspraak.
Walus is skuldig bevind en tot lewenslange tronkstraf gevonnis vir die sluipmoord op die struggle-vegter in Oktober 1993.
In 2020 het Walus om parool aansoek gedoen, maar dis deur Regter Ronald Lamola, Minister van Justisie, geweier. Sy appèl is deur die Pretoriase Hooggeregshof en die Hoogste Hof van Appèl van die hand gewys, maar het uiteindelik voor die Konstitusionele Hof beland, waar parool op 21 November toegestaan is.
Die hof se besluit is met verontwaardiging deur verskeie van die land se groot partye begroet. Lede van die Drieparty-alliansie – die ANC, die Suid-Afrikaanse Kommunistiese Party en die Kongres van Suid-Afrikaanse Vakbonde – het Saterdag buite die Konstitusionele Hof hul stemme dik gemaak.
Betogers het geëis dat die hof sy besluit oor Walus se vrylating omkeer.
Panyaza Lesufi, Gautengse ANC-voorsitter, het die besluit as ‘n onreg beskryf.
Walus sal nie na Pole gedeporteer word nie, aangesien sy paroolvoorwaardes vereis dat sy parool in Suid-Afrika uitgedien word.
Op die foto hierbo: Chris Hani se beskadigde monument
Bron: Doreen Mokgolo
