Tladi Moloi
Die Suid-Afrikaanse Nasionale Burgerorganisasie (Sanco) het ‘n ultimatum gestel aan Vrystaatse pitbull-eienaars: oorhandig jou honde binne vyf dae of ons verwyder hulle self.
Nie so vinnig nie, sê ‘n lid van die Bloemfonteinse pitbull-gemeenskap, Carmen Bester.
Sy het by Sanco gepleit om nie goeie honde van goeie eienaars af weg te neem nie.
“Die storie is hartverskeurend. Ons is lief vir ons honde,” het sy gesê.
Bester het reageer op die verklaring van Sanco provinsiale woordvoerder Tshepo Davids, wat ‘n waarskuwing gestuur het dat alle pitbull-eienaars in die Vrystaat vrywillig binne vyf dae hul honde uit die publiek uit moet verwyder.
Ten spyte daarvan dat daar geen wet teen pitbull-eienaarskap in Suid-Afrika is nie, het Davids gesê hulle sal ‘n straatveldtog begin om die omstrede ras kragdadig te verwyder.
Hy het gesê hulle hoop om hand aan hand met die DBV, SAPD en gemeenskapslede te werk.
As pitbull-eienaars nie vrywillig hul honde teen Maandag 28 November ingehandig het nie, het Davids gesê Sanco sal na eienaars se huise toe gaan en self die diere konfiskeer.
Hy sê hoewel die SAPD nog nie oor die plan genader is nie, hoop hy hulle sal Sanco-verteenwoordigers vergesel.
Dié stap kom nadat twee kinders, een agtjarige van Bloemfontein en ‘n driejarige van Hennenman, albei die afgelope weke deur pitbulls doodgebyt is.
Davids het gesê die pitbull-kwessie het ‘n “pandemie” geword, en as ‘n gemeenskapsbeweging wil Sanco optree om mense te beskerm.
“Ons het vyf dae voor ons optree. Ons sal dit waardeer as mense hul samewerking gee. Daar is reeds mense wat hul honde begin oorhandig het, want hulle verstaan wat ons probeer bereik,” het hy gesê.
Davids het gesê daar is diegene wat hul voorneem om Sanco voor die hof te daag, sou hulle hul troeteldiere met geweld afneem.
“Ons is gereed vir enige aksie. Ons het geweet daar sou ‘n mate van geweld in die proses wees en regstappe wat teen ons geneem kan word, maar ons is gereed daarvoor,” het hy gesê.
Hy het gesê hulle hoop om lede van die SAPD te betrek wanneer hulle op die honde gaan beslag lê.
Maleke Moletsane, ‘n 30-jarige van Kroonstad wat twee pitbulls besit, sê hy is gekant teen die oorhandiging van om sy honde.
“Ek het daardie honde gekoop om myself en my gesin te beskerm. Hulle was nog altyd net lojaal aan ons. Ek het hulle al vir meer as 15 jaar lank en hulle het nog nooit iemand gebyt nie. As die regering hulle afvat, moet hulle vir my die bedrag gee wat ek aan die honde bestee het. As dit gebeur, sal ek nie omgee om ‘n ander ras aan te skaf nie,” het hy gesê.
Reinet Meyer, die DBV se hoofinspekteur in Bloemfontein, het gesê hulle is nie bewus van Sanco se verklaring nie, maar dat hulle ‘n plan sal maak om sulke honde te akkommodeer, sou dit wel gebeur.
“Ná die twee voorvalle in die Vrystaat het ons die gemeenskap versoek om die gewelddadige honde wat ‘n gevaar vir die gemeenskap inhou, terug te gee,” het sy gesê.
Luitenant Kolonel Thabo Covane, die SAPD Korporatiewe Kommunikasie se skakelbeampte by Mangaung Metro, het gesê hulle was nie bewus van Sanco se veldtog nie.
Op die foto hierbo: ‘n Pitbull hond
Beeldbron: @SouthAfrican
