By Buziwe Nocuze
Sommige pasiënte kom so vroeg as 5vm by die Nyanga Gemeenskapsgesondheidsentrum in Kaapstad aan om eerste in die ry te wees.
Maar hulle word toenemend deur gewapende rowers geteiken terwyl hulle wag dat die kliniek oopmaak.
Mandisa Jiyana wil hê die departement van gesondheid moet hulle toelaat om binne die kliniek tou te staan.
“Om buite te wag is gevaarlik. Nie net word ons beroof nie, maar die kans van nog sieker word is groot, aangesien dit ysig koud is in die oggend.
“Jy sal pasiënte buite vind, selfs wanneer dit reën. As ons buite staan, stel dit ons bloot aan klomp nare dinge,” het sy gesê.
Pasiënte wat die kliniek besoek wil hê dat meer veiligheidsmaatreëls ingestel moet word.
“Ons sê nie ons sal nié binne die kliniek beroof word nie, maar dit sal nie so maklik wees soos tans die geval nie. Dit is veiliger binne as om buite te wees,” aldus Jiyana.
Nog ‘n pasiënt het aan Scrolla.Africa gesê hulle kla al jare hieroor.
“Niks verander nie. Dit wys dat hulle nie vir ons omgee nie,” het die pasiënt gesê.
Monique Johnstone, hoofkommunikasiebeampte van die Departement van Gesondheid en Welstand in die Wes-Kaap, het gesê die kliniek werk op ‘n afspraakstelsel en operasionele ure is van 7vm tot 4nm, van Maandag tot Vrydag.
“Die eerste afspraaktydgleuf is 8vm, en vir die veiligheid van ons pasiënte moedig ons hulle aan om op hul vasgestelde afspraaktyd op te daag en nie buite die perseel te tou waar hul teikens vir misdadigers is nie,” het Johnstone gesê.
Pasiënte is voorheen toegelaat om op die terrein te wag voor oopmaaktyd, maar weens ‘n bedreiging vir personeelveiligheid, diefstal en skade aan eiendom, het die bestuur opgehou om mense toe te laat om die fasiliteit binne te gaan voordat personeel opdaag.
“Daar is geen toesig om 5vm nie, en pasiënte sal dus alleen gelaat wees, wat ‘n aanspreeklikheid vir die departement kan word,” het sy gesê.
“Ons versoek dat mense ‘n afspraak maak vir gesondheidsorgdienste by Nyanga se sentrum, hul afsprake nakom en by die fasiliteit opdaag wanneer hulle geskeduleer is om deur ons gesondheidsorgpersoneel gesien te word,” het sy gesê.
Op die foto hierbo: Pasiënte wat buite die Nyanga Gemeenskapsgesondheidsorgsentrum toustaan
Beeldbron: Verskaf
