Buziwe Nocuze
Kaapstadse matrikulante het taxi-operateurs in en om die stad versoek om die provinsiale wegbly-aksie, wat vir Maandag en Dinsdag volgende week beplan word, uit te stel.
Die leerders het by die operateurs gepleit om die aksie uit te stel totdat hulle hul finalejaareksamen voltooi het.
Die staking kom nadat LUR vir Vervoer in die provinsie, Daylin Mitchell, aangekondig het dat die Blue Dot taxi-projek einde vandeesmaand beëindig gaan word.
Meer as ‘n jaar gelede het die Wes-Kaapse departement van Vervoer met die provinsiale minibus taxi-bedryf saamgewerk om die projek – ‘n aansporingsprogram om verbeterde bestuursgedrag en goeie passasiersdiensgehalte te beloon – te loods.
Die beëindiging van die projek het die Suid-Afrikaanse Nasionale Taxi-raad (SANTACO) in die provinsie kwaad gemaak. Hulle het dadelik ’n verklaring uitgereik waarin hulle die staking aangekondig het.
Hulle eis dat die departement die verordening hersien waarvolgens taxi’s geskut word, asook befondsing vir die uitbreiding van Blue Dot.
Hulle wil ook hê die Wes-Kaapse regering moet hom daartoe verbind om formaliseringspogings deur die taxi-bedryf te ondersteun, deur te belê in programme wat die bedryf bemagtig en transformeer.
‘n 17-Jarige Graad 12-leerder wat nie haar naam genoem wil hê nie, het aan Scrolla.Africa gesê sy is gestres en weet nie hoe sy op die dae van die staking by die skool gaan uitkom nie.
“Ons doen ‘n beroep op hulle om op te hou totdat ons klaar is met ons eindeksamen, want ons weet almal dat dit in protesaksie mag eindig en dan gaan ons nie skool toe nie.”
‘n Ouer het gesê om privaat vervoer vir hul kinders te organiseer sal nie help nie, want motoriste vrees die taxi-bedryf.
“Hulle het ‘n aaklige reputasie, en as hulle nie busse verbrand nie, sal privaat motors op hierdie twee dae beskadig word; daarom vra ons hulle om die staking uit te stel totdat ons kinders klaar geskryf het.”
‘n Ander leerder het gesê die tydsberekening is verskriklik. “Ons kannie daarop konsentreer om te lees nie, want ons is te gestres oor hoe ons volgende week by die skool gaan uitkom. Ons sal nie eers kan Uber op daardie twee dae nie, want hulle sal geteiken word.”
Mandla Hermanus, voorsitter van SANTACO Wes-Kaap, het gesê die uitdaging is dat die rooster nie vir almal in die provinsie dieselfde is nie, en nie almal skryf op dieselfde datums nie.
“Ouers moet met hul kinders se skole kommunikeer en hulle vra om met die departement van onderwys te praat om ‘n reëling te tref ingeval daar leerders is wat dit nie skool toe sal maak [op die dae van die staking] nie,” het hy gesê.
Op die foto hierbo: Taxi’s staan in ‘n ry op ‘n snelweg
Beeldbron: @IOL
