Lungani Zungu
Strydende partye in Ethiopië, waar die bloedigste konflik ter wêreld heers, het glo ingestem om hul wapens neer te lê.
Dit is onthul deur die voormalige Nigeriese president Olusegun Obasanjo, wat deur die Afrika Unie-kommissie opdrag gegee is om as bemiddellaar op te tree tussen die Ethiopiese regering en Tigray-magte.
Die vredesooreenkoms is in Pretoria bemiddel en word as ‘n yslike prestasie beskou.
Die konflik het vandeesmaand twee jaar gelede uitgebreek toe magte van die Ethiopiese federale regering, gesteun deur Eritrea en etniese milisies, die streeksregering van Tigray aangeval het. Albei kante het beweer die ander het eerste die sneller getrek.
Sedertdien is daar glo meer as 500,000 mense dood en miljoene meer is óf ontheem óf tot die rand van hongersnood gedwing.
Obasanjo het gesê die Ethiopiese regering en die Tigrayan People’s Liberation Front (TPLF) het ooreengekom oor “ordelike, naatlose en gekoördineerde ontwapening en die herstel van wet en orde”.
Obasanjo het die ooreenkoms as “nuwe era” vir die mense van Ethiopië beskryf.
Die twee opponente het onder andere ooreengekom oor:
· Permanente staking
· Totale ontwapening
· Toegang tot humanitêre hulp
· Samewerking om geraakte gebiede te herbou
· Versekering van sekuriteit binne Ethiopië vir betrokke organisasies
· Monitering en toesig deur ‘n AU-paneel.
Die formele samesprekings om die oorlog te beëindig het op 25 Oktober begin.
President Cyril Ramaphosa het verlede week gesê dat Suid-Afrika versoek is om die AU-geleide vredesamesprekings tussen die Ethiopiese regering en die TPLF aan te bied.
Minister van Internasionale Betrekkinge, Naledi Pandor, het ‘n beroep op al die partye gedoen om die vredesooreenkoms te respekteer.
Getachew Reda, die hoof van die TPLF-afvaardiging, het gesê: “Ons is gereed om hierdie ooreenkoms te bespoedig.”
Redwan Hussien, die hoofonderhandelaar vir die Ethiopiese regering, het saamgestem.
“Ons moet almal hierdie ooreenkoms eerbiedig sodat ons land kan aanbeweeg,” het hy verklaar.
Voormalige Keniaanse president Uhuru Kenyatta het gewaarsku dat implementering die grootste uitdaging sal wees, en dat “vernietigende spelers van binne of buite” nog die vredesproses kon ontspoor.
Hy het blykbaar verwys na die Eritrese magte en etniese Amharas wat saam met die Ethiopiese weermag geveg het.
Die formidabele AU-bemiddelingspan is gelei deur Obasanjo, en bygestaan deur Kenyatta en voormalige adjunkpresident van Suid-Afrika, Phumzile Mlambo-Ngcuka.
Die konflik, wat langdurige etniese en internasionale dimensies het, spruit uit griewe wat dateer uit die dae toe die TPLF Ethiopië oorheers het.
Hierbo: Voormalige Nigeriese president Olusegun Obasanjo, wat instrumenteel was in die bemiddeling van vrede in Ethiopië
Bron: @yusufhamidyusuf
