Everson Luhanga
Die Valke het 16 verdagtes gearresteer en beslag gelê op bates ter waarde van R18.6 miljoen in ‘n klopjag om een van die land se grootste dwelmsindikate lam te lê.
Die verdagtes, wat deel uitmaak van ‘n kokaïensmokkelkartel tussen Suid-Afrika en Brasilië, is almal Dinsdag in hegtenis geneem.
Die Valke het vroegoggend agt verdagtes in die Wes-Kaap gearresteer, voordat ‘n verdere agt hulself later die dag oorgegee het.
Die operasie was die jongste ontwikkeling in ‘n maande lange gesamentlike ondersoek deur die Direktoraat vir Prioriteitsmisdaadondersoek (Valke), die Australiese Federale Polisie, en die VSA se Federale Buro van Ondersoek (FBI).
Die agt verdagtes wat eerste in hegtenis geneem is, het later in die Bellville Landdroshof verskyn op voorlopige dwelmhandel aanklagte.
Verdagtes David Michael Banister,52, Allister William Jackson, 33, Marinus van Niekerk, 31, Jacobus Hendrik Slabbert, 41, Mario Mark Joseph, 44, John Frederick Roodman, 47, Andre Welgemoed, 44, en die 42-jarige Anthony Trevor Tarrs word almal weer op 8 November in die hof verwag vir ‘n formele borgtogaansoek.
Die res – Rafiek Baderoen, Rashied Baderoen, Michael Norman, Tenikaitis Valdas, Jaco de Kock, Izak Strydom en Hugh Stam – het hulself Dinsdag aan die polisie oorgegee.
Hulle sal na verwagting weer op 6 Desember in die hof verskyn.
‘n Israeliese burger, Ahmed Isa (ook bekend as ‘Mickey’), en twee Litause burgers, Donates Jukna en Jonas Zulpa, is steeds op vrye voet.
Meer arrestasies en beslaglegging op eiendomme wat gebruik is in die gang van kokaïensmokkelary is ophande.
Die eerste agt verdagtes se hofsake is tot 8 November uitgestel, wanneer hulle in die Pretoria Landdroshof sal verskyn om formeel vir borgtog aansoek te doen.
Kolonel Katlego Mogale, woordvoerder van die Valke, het die arrestasies bevestig.
“Nog 16 teikens, insluitend ‘n vermeende dwelmbaas wat ook in België gesoek word, is geïdentifiseer,” aldus Kolonel Mogale.
“Die ondersoek duur voort.”
Hierbo: Vermeende dwelmkartellede.
Foto: Verskaf
